Naalakkersuisoqarfik erseqqissaavoq: Qilalukkat qaqortat qernertallu tamakkiisumik atorluarneqartussaapput
Saaffiginnissutit arlallit peqqutigalugit, pingaartumik Upernaviup aqutsiveqarfianiit, Aalisarnermut Piniarnermut Nunalerinermullu Naalakkersuisoqarfik qilalukkanik qaqortarniarnermi qernertarniarnermilu maleruagassanik atuuttunit erseqqissaavoq.
- Qilalukkat qaqortat qernertallu piniagaapput pingaarutilissuit atorluagassallutillu tamakkiisumik. Allatut iliuuseqarnerit tamaasa inerteqqutaapput, akuerineqarsinnaanani nunattalu pisuussutaannik atornerluinerulluni, piniarnermut naalakkersuisoqarfik tusagassiuutinut nalunaarummi erseqqisaavoq.
Taamaammat piniarnermi inatsit atuuttoq naapertorlugu piniarneq ingerlanneqarnissaa erseqqissaatigineqarpoq.. Tassungalu ilaavoq pisarisaq tamakkerlugu atorneqarnissaa.
- Pisaqarnermi neqi, nerineqarsinnaasut atorneqarsinnaasullu tamarmik nassarneqartassapput. Akuersissuteqarani piniarneq pisaqarnissarlu asuliinnarlu ikilersuineq Kalaallit Nunaata nunanit allaniit isigineqarnerata innarlersinnaavaa piniartullu siunissami piniarnissamut periarfissaat pitsaanngitsumik sunnersinnaallugu, pininarnermut naalakkersuisoqarfik allappoq.
Maleruagassanik aalajangersakkanik unioqqutitsinerit akiliisitsinermik kinguneqarsinnaapput sunngiffimmilu imaluunniit inuussutissarsiutigalugu piniarnermut allagartamik akuersissummillu arsaarinnittoqarsinnaalluni.
- Taamaattumik naalakkersuisoqarfiup qilalukkanik qaqortanik qernertanillu piniarneq eqqissisimatitsinermullu nalunaarut atuuttoq pisassiissutigineqartullu piniartunit tamanit ataqqineqarnissaat inassutigissavaat, naalakkersuisoqarfik oqariartuuteqarpoq.