Aalisarneq

Naalakkersuisoq: Qeqertat aningaasarsiorfiusinnaavoq

Aalisarnermut, piniarnermutm nunalerinermullu Naalakkersuisup qanittukkut siunnersuutigaa Qeqertat 26-nik inulik nunaqarfinngortinneqassasoq

Karl-Kristian Kruse
– Qeqertat nunaqarfinngortinnissaanik siunnersuutiga piviusorpalaarpoq, inuiaqatigiit aningaasaqarniranerat erloqinaraluartoq. Sumiiffimmik aningaasarsiorfiusinnaasumik nassaarsimavugut, Karl-Kristian Kruse oqarpoq

Qaanaamit 60 kilometerit missaannik ungasissusilimmi kangerlummiippoq nunaqarfik Qeqertat. Tassaniippoq Qaanaap eqqaani qaleraleqarfiit annersaat.

Aalisartut 106-it aalisarsinnaanermut akuersissuteqarput. Ukiut sisamat matuma siornatigut qalerallit 50 tonsit Qaanaami Royal Greenlandimut tunineqarsimapput, ukiullu matuma siuliani 138 tonsit tunineqarsimallutik.

Aningaasarsiorfik

– Eqqaamanngilara nunatsinni siusinnerusukkut imatut pisoqarsimanersoq, tunisat ukiualunnguit ingerlanerinnaanni pingasoriaatinngorlutik, aalisarnermut piniarnermut nunalerinermullu Naalakkersuisoq Karl-Kristian Kruse (S) oqarpoq.

Taamaattumik saqqummiussimavaa Qeqertat nunaqarfinngortinneqarnissaa, tamanna sapinngisamik annertunerpaamik aningaasarsiorfigiumallugu.

Inuiaqatigiit ineriartornerat

– Naarsorsuutigaara Qaasuitsup Kommunia namminersorlutillu oqartussani attuumassuteqartut sapinngisamik piaarnerpaamik oqaloqatigiilissasut, inuussutissarsiornikkut periarfissat minnerunngitsumillu aalisarneq ineriartortinniarlugit, taanna oqarpoq.

Taanna isumaqarpoq nunami sumiiffiinni arlalinni, inuussutissarsiutit ineriartortinnissaannut periarfissarissaaraluartuni, inuiaqatigiit ineriartorneranni katataasoqarsimasoq.

Taanna naapertorlugu Qeqertani aalisarneq pilersaarusiorluartariaqartoq, tamaani inuussutissarsiornermut periarfissat tunisallu amerlassusaat suli pitsaanerulerniassammata.

Oqaluttuaq tamaat Sermitsiami nutaami atuaruk, taannalu pisiarisinnaavat uani:

Powered by Labrador CMS