Naalakkersuisoq Danmarkimut: Kangilinnguani saliinissaq eqqaamallugu

Kangilinnguani sakkutooqarfik atorneqaqqilissasoq tallimanngormat paasinarsivoq. Sakkutooqarfiusimasumilu illutoqqat qanganitsersimasut ikummatissanut atortuusivittullu atorneqalissallutik.

Sakkutooqarfik 2014-mi atorunnaarmat amerikarmiut 1942-mi sakkutooqarfigilersimasaat salinneqarnissaanut suliariumannittussarsiortoqaraluarluni.

Atuaruk: Nunatsinni sakkutooqarfik illersornissaqarfiup atuleqqippaa

Kangilinnguani saliisoqarli

Saliisoqassasoq avatangiisinut naalakkersuisup Suka K. Frederiksenip tusagassiuutinut nalunaarummi allappoq.

Namminiilivinnermut, Pinngortitamut, Avatangiisinut Nunalerinermullu atorfilittat ataasinngormat Illersornissamut Ministereqarfimmi naalakkersuisoqarfiup pisortaa Kangilinnguit pillugu oqaloqatigaat.

- Tassani erseqqissaatigineqarpoq, avatangiisinik saleeqqissaarnissaq kalaallit tungaanniit aalajangiusimaannarneqartoq – Sakkutooqarfiup sumiiffimmi pilersitseqqinnissaa pilersitseqqinnginnissaalu apeqqutaatinnagu.

Atuaruk: Kangilinnguit siunissaa oqaluuserineqaqqittoq

Akisussaaffimmik qimarngutiginnittoqassanngilaq

Kangilinnguani sakkutooqarfiup atorneqaqqilernissaanut paasissutissanik annertunerusunik sakkutooqarfiup uterfigeqqinniarpai.

- Sakkutooqarfiup qimataminik saliilluarnissaa, aammalu sumiiffimmi mingutsitaminik isumaginninnissaa pingaaruteqarluinnarmat, erseqqissaavoq.

- Avatangiisinut Naalakkersuisutut Kangilinnguit ammaqqinneqarnissaanni Danmarkip saliinissamut akisussaaffimminik qimarratiginninnissaa eqqarsaatigineqarsimappat, tamanna Kalaallit Nunaata akuerisinnaanngilaa, Suka K. Frederiksen oqarpoq.