ammanerulersitsinissaq
Naalakkersuisoq: Ammalerulersitsinissaq piffissaligaanngitsumik kinguartinneqanngilaq
Attaveqarnermut naalakkersuisup Knud Kristiansenip paasinninnera malillugu Tele-Post-ip ammanerulersitsinissaq piffissaligaanngitsumik kinguartinnikuunngikkaa oqaatigaa. Ammalerulersitsisoqarnissaali qaqagu pissanersoq suli ilisimanngilaa
Tele-Postip ammanerulersitsinissamik misissuinini unitsimmagu Atassutip Inatsisartuni ilaasortaatitaata Steen Lyngep isornartorsiorpaa, inissisimanini atornerlukkaa ilaatigut oqariartuuteqarluni.
Attaveqaatitigut ammalerulersitsinissaq pillugu Tele-Post periarfissanik misissuinikuugaluarpoq, aningaasartuunilli ikilisaasoqarneratigut misissuineq piffissaligaanngitsumik unitsinneqarallarluni. Attaveqaatitigut ammanerulersitsineq apriilip aallaqqaataanit atuutilersimasussaagaluarpoq.
Taamatut aalajangertoqarnera pillugu Naalakkersuisut arlalinnit isornartorsiorneqareerpoq.
Attaveqarnermut naalakkersuisulli Knud Kristiansenip Atassummeersup parteeqatini Steen Lynge aamma Siverth K. Heilmann pisoq nassuiaassutigaa.
- Paasinninnera malillugu Tele-Postip ammanerulersitsinissaq piffissaligaanngitsumik kinguartinnikuunngilaa, Kristiansen oqarpoq.
Attaveqaatitigut ammalerulernissaq qaqagu pissanersoq oqaaseqarfigisinnaanngikkallarpaa.
Telemik oqaloqarteqartarneq
- Tele-Post ingerlaavartumik oqaloqatigisarpara aammalu ingerlatseqatigiiffiup ilisimatitsissutigaa, ingerlatseqatigiiffik ilaatigut attaveqaatinik ataatsimut atuinermut tunisassianik suliaqartuusussanut nutaanut pilersuiniarnerminni kinguaattoortoq, pissutigalugu suliaqarneq naatsorsuutigineqartunut naleqqiullugu annertunerujussuusimammat aammalu ingerlatseqatigiiffiup piffissamut pilersaarut nutaaq suliarigaa, paragraf 37 naapertorlugu apeqqutigineqartut Knud Kristiansenimit taama akineqarput.
Akisussaasutut Tele-Post-imut allakkannik nassiussivoq, kinguaattoornermut tunngatillugu pisut erseqqinnerusumik nassuiaqqullugit aammalu ammanerulersitsiniarnermut suliap ingerlanerani pilersuinerminnut piffissamut pilersaarummik erseqqinnerusumik piumalluni.
Knud Kristiansen aalajangiissaaq
Steen Lynge aamma Siverth K. Heilmann apeqquteqarput 'Tele-Postip politikkikkut aaliangikkat qaqugu piviusunngussanersut aalajangigassarinerai'.
Knud Kristiansen apeqqummut ima akissuteqarpoq:
- Naamik, taamatut isumaqanngilanga. Ineqarnermut, Sanaartornermut Attaveqarnermullu Naalakkersuisutut, nalunaarasuartaateqarnermut suliassaqarfimmut allaffissornikkut politikkikkullu akisussaasuuvunga. Taamaattumik ammanerulersitsinissamut suliap ingerlanerata ingerlanneqartup ingerlaqqinnissaanut politikkikkut allaffissornikkullu killissaliussassat uanga aalajangersarpakka.
- Taamaattoq isumaqarpunga Tele-Post-ip tamanna tamakkiisumik akuerigaa aammalu ammanerulersitsiniarnermut suliap ingerlanerani piffissaliussat malinniarlugit ingerlatseqatigiiffik sapinngisamik pitsaanerpaamik iliuuseqartoq. Ingerlatseqatigiiffik ammanerulersitsiniarnermut suliap ingerlanerani pilersuinermini kinguaattoorpoq, kisianni tamatumunnga pissutissaqarluarsinnaavoq.