immakkut kabeli
Naalakkersuisoq: Aasiaat aappaagu immap naqqatigoortumi kabelitaassaaq
Attaveqarnermut naalakkersuisup Knud Kristiansenip (A) naatsorsuutigaa, Avannaani illoqarfik 2017-imi imaatigut kabelitaassasoq
Inuit Ataqatigiinneersoq Peter Olsen, Aasianni imaatigut kabeli qaqugu atulissanersoq allagaqarluni Naalakkersuisunut apeqquteqarnikuuvoq.
Apeqqutaanut akissut maanna takkuppoq.
- Immap naqqatigut kabelip 2017-ip naanerani Aasianni atulernissaa naatsorsuutigineqarpoq, ineqarnermut, sanaartornermut aamma attaveqarnermut naalakkersuisoq, Knud Kristiansen (A), akissuteqaammini taama allappoq.
Atuaruk: Aasiannut immap naqqatigut kabeleqalersitserusuttoq
Pitsanngoriaatit
Peter Olsenip aamma apeqqutigaa, akit inuiaqatigiinnut assigiinnerulerumaarnersut.
- Naalakkersuisut maannarpiaq Tele-Postip illoqarfinni immap naqqatigut kabeleqarfiusuni tunisassiaanut akinillu aalajangersaasarneranut akulerunnissartik naatsorsuutiginngilaat, attaveqarnermut naalakkersuisoq akivoq.
Kisianni Knud Kristiansenip ilanngullugu oqaatigaa, immap naqqatigut kabeli avannamoortoq ingerlalerpat Ilulissani, Aasianni, Sisimiuni Maniitsumilu bredbåndimut tunisassianik pitsanngortitsinissamut ingerlatseqatigiiffik pilersaaruteqarluni ilisimatitsisoq.
Atuaruk: Diskomut immap naqqatigut kabeleqalissanngikkallarpoq
Inuiaqatigiinnut akisooq
Inuit Ataqatigiinni qinikkap aamma apeqqutigaa, Upernavik, Qaanaaq, Tasiilaq aamma Ittoqqortoormiit sukkanerusumik siunissami interneteqalerumaarnersoq.
Inatsisartut nalunaarasuartaateqarnermut inatsit aqqutigalugu Naalakkersuisut, illoqarfinni nunaqarfinnilu pitsaassusissamik aalajangersaanissamut sakkussaqartippaat, Naalakkersuisunut ilaasortaq allappoq.
- Qaffasissusissaq suli aalajangerneqanngilaq, kisiannili qaffasissutsimik akikitsumik qulakkeerinissaq inuiaqatigiinnut nalunaarasuartaatinillu atuisunut akisussasoq qularnanngilaq. Sumiiffinni qaammataasaqarfiusuni pitsannguinerit akisupput, koruunillu niuernermik tunngaveqanngitsunut aningaasaliissutissatut kissaatigineqartut tamarmik arlaanniit aaneqartussaapput.
Taassumali ilisimatitsissutigaa, Upernavimmut tunngatillugu radiokædep Uummannamiit Upernavimmut tallineqarnissaa naatsorsuutigineqartoq.