nittartagaq nutaaq
Naalakkersuisoq: Aappariinni annersaasoqartarnera ajornartorsiutaavoq
Inooqateqarnerit.gl-imi aappariinneq aappariinnermilu persuttaasarneq pillugu nittartagaq Naalakkersuisunut ersersinniarneqarpoq
Inuusuttorpassuit arnat angutillu timikkut, tarnikkut kinguaassiutitigulluunniit aapparminnit aappakuminnilluunniit annersarneqartarput. Ikittuinnaalli ikiortissarsiortarput. Taamaattumik Naalakkersuisut maannakkut aappariinni annersaasoqartarnera nittartakkakkut ugguuna oqallisigitikkusuppaat inooqateqarnerit.gl
- Aappariinni annersaasoqartarnera ajornartorsiutaavoq iluamik sammineqarneq ajortoq, oqallisiginerusariaqagarput. Aappariinni annersaasoqartarnera pillugu nittartagaq nutaaq ilaqutariinni persuttaasoqartarneranik pinaveersaartitsiniarnermi iliuuseqarnissanut atortussiaavoq pingaarutilik. Inuusuttut inuunerminni persuttaasoqartarnera akuersaaginnassanngilaat, aammalu namminneq ileqqut tamakku inersimasunngorlutik aappaqalerunik ingerlateqqinnagit, Ilaqutariinnermut Naalakkersuisoq, Martha Lund Olsen tusagassiutinut nalunaarummi oqarpoq.
Annersaasarneq paqumigineqartoq
Naak aappariinni persuttaasoqartarnera eqqugaasunut kingunipilutsitsisaraluaqisoq ilaatigut tarnikkut ajornartorsiuteqalersitsilluni aammalu inuusuttut akornanni imminut toqoriartartut amerlallutik, taamaattoq aappariinnermi persuttaasoqartarnera ima paquminartinneqartigaaq, allaat amerlasoorpassuit ikiugassaasaraluarlutik ikiorneqanngitsoortarlutik. Taamaattumik inuusuttut kisimiinngitsut oqarfigissallugit pingaartuuvoq, aammalu sumi ikiorneqarsinnaanerlutik taamaalillutillu allat aamma ikiorlugit.
Inooqateqarnerit.gl oqaluttualianik, sisamanik oqariartuuteqartunik imaqarpoq inuusuttunit atuakkiornermik misileqqaartunit allanneqarsimasut, Rosine Kreutzmannimit kiisalu Sørine Steenholdtimit, nammineq atuarneqarsinnaasut imaluunniit aappariinni persuttaasoqartarnera pillugu oqaloqatigiinnerni atorneqarsinnaasut. Nittartagaq taanna aammattaaq angajoqqaanut isumaaluutilinnut tunngasuuvoq, panimminnut ernerminnulluunniit aappariinnermi annersaasoqartarsinnaaneranut isumaaluutilinnut kiisalu allaffissaq, meeqqat illersuisuanni siunnersortinit MIO akineqartartussaq.
Majip qaammataani www.inooqateqarnerit.gl nunatsinni atuarfinni ilinniartoqarfinnilu plakatinngorlugu takusassiarineqassaaq kiisalu ilinniusiatut suliaralugu, taamaalilluni allakkiat saqqummersitat, oqaluttualiat eqquiniaatitsinerillu nittartakkakkut ilinniartitisunit aaneqarsinnaanngussallutik. Tamatuma saniatigut Facebookikkut unammisitsisoqassaaq, tassani ajugaasup eqqugassarissallugu iPhone 5S.
Inooqateqarnerit.gl iserfigiuk