Naalakkersuisooqatigiit nutaat ullumikkut tunngavilerneqarsinnaapput
Inuit Ataqatigiinnit isumaqatiginninniutaasoq Siumumit maanna utaqqimaarneqarpoq
Taamaattorli naalakkersuisooqatigiit tunngavigisaat qanoq isikkoqassanersoq aammalu naalakkersuisooqatigiilertussat partiit sorliussanersut, apeqqutaavoq IA ullumikkut qanoq apuussaqarumaarnersoq, Siumup siulittaasua Kim Kielsen Sermitsiaq.AG-mut oqarpoq:
- Kingusinnerpaamik ippassaq pitsaasumik siunnerfeqaqatigiiffiusumillu ataatsimeeqatigiippugut, maannakkorpiarlu isumaqatigissuteqarsinnaanermi peqatigiissinnaanerluta ilisimatitsinissaanut IA utaqqivarput. Pingaartumik aalisarnermut inatsisissamut tunngatillugu sukumiinerusumik oqaloqatigiinnissaq pisariaqartitsiviusinnaavoq. Taamaattorli Siumumit IA-mut erseqqissaatigereerparput naaperiaanissamut piumassuseqarluarluta, taamaalilluni inatsit sapinngisamik tamatta naammagisimaarsinnaasarput aammalu minnerunngitsumik aalisarnermik inuussutissarsiuteqartut naammagisinnaasaat iluaqutissarsiffigisinnaasaallu anguniassagatsigu. Siumumit piareersimavugut aalisarnermut inatsisissaq naleqqussassallugu, tassanilu pingaaruteqarpoq susassaqartut qanimut suleqatigalugit ilusilersuisoqarnissaa, Kim Kielsen itisiliivoq.
Kim Kielsen-ip ilanngullugu erseqqissarpaa Demokraatit isumaqatigiinniarnernit tunuarnerat tusaatissatut tigullugu, taamaattorli uggornarnerarpaa:
- Naapissinnaalluaraluarpugut, tassami Siumut sulissuteqarpoq nunatsinni inuussutissarasiornermik ingerlataqartut pitsaasunik sinaakkutaqartinnissaannik, ilaatigut ingerlatseqatigiiffiit akileraarutaannik appaanissamik siunertaqarluni, taamatuttaaq sulissutigaarput innuttaasut aningaasatigut toqqammavigissaarnerulersinneqarnissaat. Assersuutigiinnarlugu Siumut ulloq siullermiit isertitakinnernut, akunnattumik isertitalinnut aammalu utoqqalinersiutilinnut atugassarititaasunik pitsanngorsaaniarpoq.
Kim Kielsen aperaarput IA isumaqatigiinniarnernit tunuassagaluarpat allaanerusumik iliuuseqarnissaminut pilersaaruteqarnersoq:
- Periarfissat tamarmi suli ammapput, taamaattorli IA-mit utertiffigineqarnissarput utaqqeqqaassavara. Ippassaq ataatsimeeqatigiinnitsinni toqqarpaat siulersuisuminnut tusarniaaqqaassallutik, sulilu uterfiginngilaatigut, taamaammat utaqqivagut, Kim Kielsen Sermitsiaq.AG-mut oqarpoq.
Siumup siulittaasuata Kim Kielsen-ip erseqqissaatigaa tusagassiuutitigut isumaqatigiinniarnerit ingerlanneqarnissaat nammineq kissaatiginngikkini.