Politik
Naalakkersuisooqatigiit maanna annakannajaarput
Demokraatit illuttut akimmissimaarfeqarput: Naalakkersuisooqatigiinni suleqatigiinnerup attatiinnarneqarnissaa aammalu tunuliaqutiminnik naammagisimaarinnitsitsinermik pilersitsinissaq. Taakku marluk imminnut akerleriissinnaapput
AKUSIUINEQ: Politikerit aamma ambassadørit ullumi Københavnimi tusagassiortuni Kalaallit Nunaatalu ikinngutaannik nillaarissumik hvidviinnimik imerujoorneranni, naalakkersuisooqatigiit ullumikkumut aatsaat taama immaqa unammilligassaqartigipput.
Tassami pingasuusut Siumut, Demokraatit aamma Atassut pataajaatsumik tunngavissamik pilersitseqqinnissaat qularnarmat, ippassaq Demokraatit siulittaasortik tusaamasaq, Anda Uldum, ukioq ataasiinnaq siulittaasooreersoq politikkimit tunuavinnerarlugu nalunaarutigimmassuk.
Andap atorfeqarnera assiliartalersorlugu takuuk
Naalakkersuisut siulittaasuat, Kim Kielsen (S), ullumikkut pingasunngornermi Kalaallit Nunaata Københavnimi aallartitaqarfiani ukiumoortumik ukiortaami ilassinninnermi qaaqqusisuuvoq.
Anda Uldumip tunuarnera Kielsenip ugguaraa
Tassanilu parteeqatai Vittus Qujaukitsoq aamma Martha Lund Olsen peqataapput, taamatullu Demokraatit siulittaasorigallagaat Randi Vestergaard Evaldsen ippassaq Københavnimut tikippoq.
Kielsenip marlunngornermi oqaatigisai upperissagaanni, politikerit naalakkersuisooqatigiinneersut Nordatlantens Bryggemi qallunaat kalaallillu pikkorissortaanik oqaloqateqarnissaq qungujunnissarluunniit piffissaqarfigineqarpiarnavianngilaq.
Qinikkat taakku sisamat akornanni Københavnimi Naalakkersuisut qanoq aaqqissuunneqarnissaat siullermik oqaluuserineqassaaq, Anda Uldumip Nunatta karsianut aamma aatsitassaanut sukkasuumik akisussaanerminit tunuarnerata kingorna.
Politikkikkut oqaaseqartartoq Sten Lund, ippassaq Uldumip tunuarnera Demokraatinut nukillaarsaataasoq KNR-imut naliliivoq.
Atuaruk: Oqaaseqartartoq: Uldumip taamaatinnerata Demokraatit nukillaartippaat
Kisianni aamma naalakkersuisooqatigiit taamaariaannaapput.
Tassami inuiaqatigiit piffissaq sivikitsoq qaangiuttoq Aleqa Hammondip naalakkersuisooqatigiilia uppisinnerisa kingorna, ukiumi siullermi Demokraatit naalakkersuisooqataaneranni Anda Uldumi iluarineqartutut aamma maligassiuisutut ingerlavoq.
Ukiumi 2014-15 nikiffiani maannamullu inatsisissatut siunnersuutinik akerleriiffiusunik arlalinnik saqqummiussisoqarpoq aammalu Naalakkersuisut akornanni napparsimanernik nalunaaruteqartoqaqattaarluni, tamaammallu partiini naalakkersuisooqataasut akornanni nukittuunik siuttoqarnissaq pisariaqarsimavoq.
Demokraatit Anda Uldumip illersorpalaartumik oqariartuutai aamma inunnik tapersersorneqarnera, partiip akitsuutinik nutaanik eqqussuisoqarnerata qaffaasoqarneratalu kingorna isornartorsiorneqaramik atorfissaqartilerpaat - taakkulu allaat Demokraatit akerlerilluinnarsimasaralui Siumukkut suleqatigalugit piviusunngortinneqarput.
Uldumip taartissaata naalakkersuisooqatigiit politikkiata tatiginartumik aammalu saniatigut Demokraatit takorluugaat illersornissaanut suliassap annertoorujussuunissaa qularnanngilaq.
Aamma takukkit:
Anda Uldum politikkimit tunuarpoq
Randi: Andap aalajangernera paasinarpoq