aaqqissuusseqqinneq

Naalakkersuisooqatigiit aaqqissuusseqqinnerat siulleq

Sioqqutsisumik soraarnerussutisiaqarnerup Naalakkersuisunit aaqqussuussaaqqinnera pillugu isumaginninnermut naalakkersuisoq Martha Lund Olsen saqqummiussissaaq

Tusagassiortunik katersortitsisoqarnerani sioqqutsisumik soraarnerussutisiaqarnerup Naalakkersuisunit aaqqussuussaaqqinnera isumaginninnermut naalakkersuisumit Martha Lund Olsenimit Siumumeersumit saqqummiunneqassaaq ullumi ataasinngornermi.

Aaqqissuusseqqinneq
Sanngiinnerpaanut aaqqissuusseqqinneq iluaqutaassasoq, akisussaasoq Martha Lund Olsen oqariartuuteqarpoq.

- Aaqqissuusseqqinnermi sanngiinnerpaat aningaasanik tigusiffigineqassasut isornartorsiorneqarpugut, kisianni aaqqissuusseqqinnikkut sanngiinnerpaat aningaasanik tunineqassapput, Martha Lund Olsen oqarpoq.

Nunatsinni sioqqutsisumik soraarnerusssutisiaqartut 2.936-t aaqqissuusseqqittoqarnera malugissavaat. Kommuninit aalajangersorneqartalissaaq siusinaarlutik soraarnerussutisiaqartut 18-init 59-nik ukioqartut sulisinnaanersut. Sulisinnaanerusut amerlanerusunik periarfissaqalersinnaanissaat neriuutigineqarpoq.

60-nik ukioqalereersimasut nalilersorneqartassanngillat, soraarninngorsimasutullu inissinneqartalissallutik.

Nalilersuisarnissat
75.000- init 150.000 koruuninut ukiumut aningaasarsiallit siulliullugit nalilersorneqartalissapput. Angusaqarfiulluarnissaa Martha Lund Olsenimit neriuutigineqarluarpoq.

Aaqqissuusseqqinneq taanna Inuit Ataqatigiinnit isornartorsiorneqartareerpoq, pilersaarutinik amigaateqarnerarlugu ilaatigut isornartorsiuillutik.

Sulisorineqartut
Naalakkersuisulli naatsorsuutigaa aaqqissuusseqqinneq atuutilissasoq. 3 million koruunit sinnilaarlugit ukiut tamaasa sulisunut atorfinititsinernut atorneqartalernissaat naatsorsuutigaa. Siunnersuut amerlanerussuteqartunit akuerineqassappat aamma ilinniarfimmik aallartitsisoqarnissaa siunnerfigineqarpoq.

Aaqqissuusseqqinnerup 2016-mi atuutilernissaa siunnerfigineqarpoq. Siusinaarlutik soraarnerussutisiaqartut 400-t missaanniittut aamma nalilersorneqassapput.

Powered by Labrador CMS