Naalakkersuisooqatigiinnissamut isumaqatigiissut atsiorneqarpoq
Siumut, Nunattai Qitornai, Atassut aamma Partii Naleraq tusagassiortunik katersuutitsipput
Partiini siulittaasut Kim Kielsen, Hans Enoksen, Siverth K. Heilmann aamma Vittus Qujaukitsoq Naalakkersuisooqatigiinnissamut isumaqatigiissut atsiorpaat.
Inuit Ataqatigiit aamma Demokraatit sooq suleqatigineqannginnersut Kim Kielsenimit oqaatigineqarpoq.
Naalakkersuisooqatigiilersuni partiit siulittaasui Siverth K. Heilmann, Vittus Qujaukitsoq aamma Hans Enoksen oqaaseqarput.
Hans Enoksen Inatsisartuni siulittaasunngussaaq.
Kikkut Naalakkersuisuussanersut kingusinnerusukkut saqqummiunneqarumaarpoq.
Isumaqatigiissutip qulequtaraa 'Nunarput - ataatsimoorfiusoq - ineriartorfiusoq - tamanut inissaqartitsisoq'
- Partiit akunnerminni isumaqatigiissutigivaat iluarsartusseqqinnertigut sulissutigineqassasoq innuttaasut atugarisaasa pitsanngorsarnissaat aammalu minnerunngitsumik aningaasarsiornikkut siuariartortitsisoqarnissaa, taamaaliornikkut suliffissat nutaat pilersinneqarsinnaassammata sulisinnaasullu amerlanerusut sulilersinneqarlutik, isumaqatigiissummi ilaatigut atuarneqarsinnaavoq.
Partiit ukiuni sisamani suleqatigiinniarlutik neriorsuutigaat.
- Nunatta oqaluttuarisaanerani maannamut suliniutit annersaat nutaanik mittarfinnik pilersitsinissaq naammassiniarlugu naalakkersuisooqatigiit sulissapput, aammalu erngup nukissiorfissat nutaat sanaartorneqarnissaat anguniarlugu sulissallutik.