partiinut tapiissutit
Naalakkersuinermik sulinermut tapiissutinik millioninik qaffaaneq
Akileraartartut partiinut Inatsisartuniittunut saniatigut 3 millionit koruuninik siunissami akiliinerusalissapput. Partiit ukiumut 10 millionit koruuninik pissarsiaqartareerput.
Tamanna Inatsisartut Siulittaasoqarfiata inatsisissatut siunnersuutaani takuneqarsinnaavoq.
Annertuumik qaffariartoq
Januaarip aallaqqaataani 2018-imi atuutilersumik, partiimut tapiissut 30 procentimik qaffariassasut siunnersuummi atuarneqarsinnaavoq. Annertuumik qaffariaateqarnera partiimut tapiissutip 2006-imili aaqqiivigineqarnikuunnginneranik tunngavilersorneqarpoq.
Siumut pissarsiaqarnerpaassaaq, siunnersuut akuerineqassappat partiip karsianut saniatigut 1.045.000 koruuninik pissarsiaqassaaq.
Partii ullumikkut tunngaviusumik tapiissummik taaguuteqartumik 650.000 koruuninik pissarsiaqartarpoq, aamma Inatsisartunut ilaasortaatitat tamarmik immikkut 210.000 koruuninik pissarsissutaasarput. Tamanna tunngavigalugu Siumut 3,380 millionit koruuninik pisortanit tapiissutinik pissarsiaqartarpoq. Inatsisissatut siunnersuut akuerineqassappat tamanna 4,425 millionit koruuninut qaffariassaaq.
Tunngaviusumik tapiissut aamma ilaasortamut tapiissut
Partiinut tunngaviusumik tapiissut 650.000-nit 850.000-nut qaffanneqassasoq inatsisissatut siunnersuummut nassuiaatini atuarneqarsinnaavoq, ilaasortamut tapiissutit 210.000 koruuninit 275.000 koruuninut qaffanneqassapput.
Partiimut tapiissummi qaffariaat annertooq 2018-imi aningaasanut inatsisissamut ilanngunneqarsimanngilaq. Tassa imaappoq, naalakkersuinermik suliaqartut 2,75 millionit koruunit missaannik sipaarniarfissanik ujaasisariaqassapput.
Saniatigut ima pissarsiaqartigissapput
Siunnersuut akuerineqassappat, partiit saniatigut ima pisartagaqalissapput:
- Siumut 1.045.000 koruunit
- IA: 915.000 koruunit
- Demokraatit: 395.000 koruunit
- Parti Naleraq: 395.000 koruunit
- Attaviitsoq: 65.000 koruunit
Katillugu ima pissarsisassapput
Siunnersuut akuerineqassappat malittarisassa naapertorlugit partiinut tapiissutit katinnerat:
- Siumut: 4.425.000 koruunit
- IA: 3.875.000 koruunit
- Demokraatit: 1.675.000 koruunit
- Partii Naleraq: 1.675.000 koruunit
- Attaviitsoq: 275.000 koruunit
Ukiut tamaasa aaqqinneqartartoq
Tapiissutit siunissami Kalaallit Nunaanni kisitsit akinut iluarsiissutaasartoq malillugu, tapiissutit ukiut ingerlanerini naleerukkiartornissaat pinngitsoortinniarlugu iluarsineqartariaqartut, siunnersuummi aamma atuarneqarsinnaavoq. Iluarsiineq siulleq januaarip aallaqqaataani 2019-imi pissaaq.
Inatsisissatut siunnersuut sisamanngorpat oktobarip 19-anni siullermeerneqassaaq.