Naalagaaffeqatigiit ataatsimiinnerat: Tunngaviusumik inatsit pillugu naapeqatigiittoqarunartoq

Naalakkersuisut siulittaasuat Kim Kielsen, ministeriunerlu Lars Løkke Rasmussen aammalu Savalimmiuni lagmand Aksel Johannesen ullumi nalaagaaffeqatigiinnermut tunngatillugu ukiumoortumik ataatsimiinneranni qallunaat qeqertaaraanni Christiansømi Bornholmip avatinnguani Erfalasorput savalimmiormiulli erfalasuat takussaapput.

Aamma atuaruk: USA-p qimataanik saliinermut Danmark akiliiniarpoq

Kim Kielsenip ministeriunerullu Qallunaat Nunaata ukiuni tallimani tulliuttuni 150 mio koruunit amerikamiut sakkutooqarfigisimasaanni saliinissamut atungassanik immikkoortitsisoqassasoq isumaqatigiissutigalugu atsioqatigiissutigaat.

- Isumaqatigiissut pitsaalluinnartuuvoq. Ukiup tulliani tingussaasunik takussutissartaqalerumaarpoq, Kim Kielsen iluarusimaaqaluni oqarpoq.

Tunngaviusumik Inatsit pillugu Løkke mianersoqqusisoq

Kalaallit Nunaanni tunngaviusumik inatsit suliaq pillugu, ministeriunerup mianersoqqussutigisimasani aalajangiusimavaa:

- Aniniarluni pissuseq kisiannilu uninngaannarniarluni pisinnaanngilarput – sammisamulluunniit pissutsit arlallit, naalagaaffeqatigiit ataatsimiinnerisa kingorna tusagassiortunik katersortitsinermi taanna oqarpoq.

Tunngaviusumik inatsisissamik eqqarsaat ilaannakoortumik atuutitsilerniarneq, Kalaallit Nunaat namminiilivinnialeruni qallunaat naalakkersuisuisa paasinnittaasiat malillugu soorunami akuerineqarsinnaanngilaq. Periuseq tamanna tunngaviusumik inatsisissamut ataatsimiititaliap suleriaaserisussaangaluarpaa.

Taamaattoq Kim Kielsenip minisiteriunerullu tamanna naapeqatigiissutigisimangunarpaat.

Tusagassiortunik katersortitsinermi Kim Kielsenip Kalaallit Nunaata namminiilivinnissaa anguniangaralugu arlaleriarluni oqaatigaa. Kisianni tusagassiortut allallu piffissami matumani tunngaviusumik inatsissap suliarineqarnerata aallarteqqammernerani qallunaat kalaallillu aporaaffigisinnaasaannik eqqoriaaqqusinngilaq

- Tunngaviusumik inatsissamut ataatsimiititaliaq eqqissitillugit sulitinniarsigit, taava takusaqarumaarpugut, taanna oqarpoq.

Naapeqatigiissut

Ministeriunerlu isumaqarpoq, Kalaallit Nunaanni tunngaviusumik inatsimmik suliaqarneq suli ersarissumik anguniangaqanngitsoq.

- Suliarineqartut marluupput, aalajangerneqarsimanngilarlu sorleq atorniarneqarnersoq, taanna oqarpoq, Kim Kielsenillu taanna akissuteqarfiginngilaa. Tassungapiarlu tunngatillugu naapeqatigiissuteqartoqarsimasinnaaneranik paasineqarsinnaalluni.

Tunngaviusumik inatsissamut ataatsimiititaliap qanorluunniit tunngaviusumik inatsit saqqummiukkaluarpassuk, Københavnimi naalakkersuisut Kim Kielsenip Naalakkersuisulluunniit tunngaviusumik inatsit qanoq isikkulik atorneqassanersoq naggataanilu taasissutigineqartussaq aalajangiuffigineqarsimannginnera tikkuassavaat.

Savalimmiormiut misilittagaat

Ministeriuneq tusarnaarluarpoq, lagmandip Aksel Johannsenip savalimmiormiut ukiup tulliani tunngaviusumik inatsisissaq qallunaat tunngaviusumik inatsisaannut assingusumik qinersinissaannik nassuiaateqarmat. Ministeriunerullu folketingimi ilaasortat maajip qaammataani eqqaasippai savalimmiormiut qanoq ilungersorlutik suliaqarsimanerannik. Qallunaat naalakkersuisuisa 2000-mi savalimmiormiut namminiilivinnermut ikaarsaariarnermut kissaataat sakkortuumi issuarpaa:

- Taamatut ingerlaannassangussi, ukiut sisamat qaangiuppata qallunaanit bloktilskud peerneqassaaq.

Oqariartuut isumaqatiginninniarnernik kipitititsisoq. Savalimmiunilu tunngaviusumik inatsissamik suliaqarneq taamaateriarlugu aallaqqaataaneerneqarpoq – Københavnimi iluatsinngitsoornerup ukiut 18-ni matuma siorna – savalimmiormiut tunngaviusumik inatsisissaq naalagaaffeqatigiinnermik avissaartuuffiunngitsoq taasissutigissavaat.

Kinaassutsimut uppernarsaat

- Kinaassutsimut uppernarsaat, lagamandip taama taavaa.

Naalagaaffiit naapeqatigiinnerisa kingorna Lars Løkke Rasmussen ukiumoortumik ingerlanneqartartumik Bornholmimi inuit naapeqatigai, Kim Kielseni nulianilu Judithe inuiattut ullorsiornissap qalliartornerani angerlamut aallartut.

Martin Breum tusagassiortuuvoq atuakkiortuullunilu. Taanna Issittoq pillugu Sermitsiami allaaserinnittarpoq.