- Naalagaaffeqatigiinnerup siunissaa aarlerinartorsiorpoq

2012-imi ulloq suliffik kingulleq Folketingimit 2013-imut aningaasanut inatsit akuersissutigineqarpoq.

Aningaasanut inatsisip pingajussaanneerneqarnerani kalaallit folketingimut ilaasortaatitaasa marluullutik aappaagu aningaasanut inatsimmik naammagisimaarinninnertik ersersippaat.

Kisianni Siumut sinnerlugu Doris Jakobsenip, oqalinnermi ilungersunartumik saqqummiussivoq, oqaluttarfimmit naqissuseramiuk naalagaaffeqatigiinnerup siunissaa taartuinnaasoq, Folketingimi amerlanerussuteqartut Kalaallit Nunaanni suliniutinik angisuunik aallartitsisinnaanermut periarfissaq mattunneqassappat.

- Kalaallit demokraatiskimik ingerlatsinerat Danmarkip nunanut allanut inatsimmik pissaaneqarneranit akornusersorneqassaaq, tamannalu ataqqinassusilimmik demokraatiskimik ingerlatsinermi periarfissaasariaqanngikkaluarpoq, Doris Jakobsenip aningaasanut inatsimmik oqallinnermi oqaaseqaatigaa.

Siunissaq taartuinnaasinnaavoq
- Aamma isumaqarpunga pingaaruteqartorujussuusoq periarfissaq taanna atorneqarpat Naalagaaffeqatigiinnerup siunissaa qernertuinnaassammat, nangilluni oqarpoq.

IAmit Sara Olsvig erseqqissaavoq Danmarkip tapiissutai ullumikkut nikinneq ajulersitaanerat pissutigalugu aningaasarsiorfissanik allanik periarfissiisoqarnissa sulissutigineqartariaqartoq.

- Isertitassat qilammik nakkaanngillat. Uagut nammineq pilersittariaqarpavut. Aamma aatsitassat taakkutuaannanngulerput aningaasarsiorfissatut periarfissagut, Sara Olsvig Folketingip oqaluttarfianit oqarpoq.

Sara Olsvig aamma Folketingimi issiasunut eqqaasitsissutigaa Kalaallit Nunaata Danmarkillu ataatsimoorlutik namminersornermik inatsit atsioraat.

- Ataatsimoorluta isumaqatigiissutigaarput namminersornermik inatsit, tassaniippiarpoq kalaallit aningaasaqarnerata ineriartortinneqarnissaani sumiiffimmi isumalluutit pigisavut misissuifigalugillu piiarnissaat, Sara Olsvig naqissusiivoq.