Wednesday, January 11, 2017 - 12:30

Naalagaaffeqatigiinnermut naneruarlutik ingerlaaqatigiittutq

Naalagaaffeqatigiinneq atorunnaarsinneqarani nukittorsarneqassaaq, eqimattat Danmarkimi, Kalaallit Nunaanni aamma Savalimmiuni politikerinut oqariartuuteqarniartut isumaqarput

Københavnimi naneruarlutik Kalaallit Nunaanni oqallinneq assorlugu ingerlaniarput.

Ingerlaaqatigiinnissamut aaqqissuisut naalagaaffeqatigiinneq nangaassuteqaratik tapersersorlugu malunnartinniarpaat.

- Kalaallit Nunaanni Savalimmiunilu namminersulivinnissamik aalassassimaartoqarneranik naalagaaffeqatigiinneq ukiuni makkunani tatisimaneqarpoq, Jairus Lyberth oqarpoq, taanna ingerlaaqatigiinnissamut aaqqissuisut ilagaat.

- Naalagaaffik ataatsimooqatigiinnermik iluaquteqartoq malunnartinniarparput, taanna nassuiaavoq.

Atuaruk: Naalakkersuisoqatigiilersut namminersulernissaq naligiinnerulernissarlu pingaartippaat

Tapersersuisunut nipeqartitsiniartoq
Naneruarluni ingerlaaqatigiinneq Christian Slotspladsimit aallartissaaq, Nordatlantens Bryggemullu ingerlaassalluni, tassani Naalakkersuisut ukiortaami ilassinninnerat pisussaavoq.

Tamatuma ingerlanerani kontradmiral Niels Wang, nunanut allanut ministeriusimasoq Martin Lidegaard (R), konservativeq Rasmus Jarlov, Magnus Herdalur Savalimmiuneersoq aamma naalagaaffeqatigiinnissamut suliniuteqartoq Nauja Lynge oqalugiassapput.

- Naalagaaffeqatigiinnermut tapersersuisunut oqariartuuteqartitsiniarpugut. Tamanna amigaatigineqarpoq, Jairus Lyberthh nassuiaavoq.

Atuaruk: Tunngaviusumik inatsisiliornissamut ataatsimiititaliaq Inatsisartunit suliaripallanneqartoq

Namminersulivinnissaq taamaatinneqarli
Jairus Lyberthip nammineq inuttut isumaa qularnanngilaq. Kalaallit Nunaata siunissaa naalagaaffiup avataaniunngitsoq iluaniissasoq, taanna isumaqarpoq.

- Namminersulivinnissamik eqqarsaateqarneq taamaatittariaqaripput isumaqarpunga, taanna oqarpoq.

Politikerimik arlaatigut namminersulivinnissamik akuersaanngitsumik nassaartoqarsinnaanera ajornarluinnarneranik aperineqarnermini, piffissaq apeqqutaaginnartoq taanna isumaqarpoq.

Atuaruk: Naalagaaffeqatigiinneq oqallisigineqalersoq

- Naalagaaffeqatigiiginnarnissamik ilungersuuteqartumik politikkikkut saqqummertoqarnissaa upperaara, Jairus Lyberth oqarpoq.

- Naalagaaffeqatigiinnermik tapersersuisut politikkikkut sinniisoqannginnerat oqartussaaqataanermik ajornartorsiutitut isigaara, taanna oqarpoq.

Sermitsiami isumasiusoqarnerani namminersulivinnissaq anguniakkatut pingaaruteqarneranik, 64 procentit isumaqartut takutinneqarpoq. 24 procentit tamanna pingaaruteqanngitsoq isumaqarput.

Læs også

Seneste nyheder / Nutaarsiassat kingulliit