Innuttaasut ataatsimiinnerat

Naalagaaffeqatigiinneq oqaluuserineqassaaq - Kalaallit Nunaat peqataanngitsoq

Politikerit ukiumoortumik Bornholmimi festivalertarnerat tusagassiorfinnit sammineqartartorujussuaq ingerlanneqangajalerpoq. "Naalagaaffeqatigiilli issittumi naalagaaffittut" oqaluuserineqalerpat Kalaallit Nunaat Savalimmiullu peqataatitaqassanngillat

Lars-Emil Johansen, Idealisten, premieren, Niels-Frid Nielsen, DR
Lars-Emil Johansenip filmi Idealisten pillugu Politiken-ip aaqqissuisuunera Bo Lidegaard oqalliseqatigissavaa. Aana Lars-Emil Johansen Idealisten-ip Nuummi takuteqqaarneqarnerani Danmarks Radio-meersumit Niels Frid-Nielsenimit apersorneqartoq

Naluneqanngitsutut Kalaallit Nunaat naalagaaffeqatigiinni issittumi inissisimatuaavoq. Taamaakkaluartoq - programmi malillugu - politikerit Bornholmimi Innuttaasut Ataatsimiinneranni festivalerneranni nuannarineqartartumi "Naalagaaffeqatigiit Issittumi naalagaaffittut" oqaluuserineqalerat panel-imi Kalaallit Nunaannit peqataasoqassanngilaq. Naalagaaffeqatigiinneq pillugu oqallinnissami pingaarutilimmi aamma Savalimmiut aallartitaqassanngillat.

Isummerfiginiagassat naammakkaluaqaat.

"Kalaallit Nunaanni aningaasarsiorneq unittooqqavoq, sulili namminersulivinnissamik sinnattu pigineqarpoq. Tamanna peqatigalugu Danmark naalagaaffeqatigiit attatiinnarniarlugit pingaarutilimmik qinigassaqarpoq. Sooq Issittoq taama pingaaruteqartigaa, naalagaaffeqatigiillu sumut ingerlappat", aaqqissuussinermi peqataanissamut pisortatigoortumik kajumissaarummi allassimavoq, tassungalu aallaaviuvoq tusagassiortup atuakkiortullu Martin Breum-ip, "Balladen om Grønland"-imik atuakkiorsimasup, saqqummiussaa. Tamatuma saniatigut peqataassapput Jens Olag Pepke Pedersen, DTU Space-mi seniorforskeri, Johannes Nordby, forsvarsakademi-mi analytikeri, kiisalu Nils Wang, Forskvarsakademi-mi kontreadmirali/moderatori, taakkualu Hjemmeværnet peqatigalugu aaqqissuussaq ingerlappaat.

Akerlianik nunanut allanut isumannaatsuunermullu politikkimi aaqqissuussami "Arktis i nyt farvand, hvordan navigerer vi", Kalaallit Nunaannit peqataassaaq IA-p siulittaasua Sara Olsvig, taannalu Norden i Fokus-imit, Folketingimit Forsvarsakademi-millu aaqqissuunneqarsimavoq.

Oqallinnermi aallaaviussaaq silap pissusiata allanngoriartornera, Issittumi periarfissanik unammilligassanillu nutaanik pilersitsisoq.

"Asiamut niuernermi aqqutissat nutaat ammartussanngorput. Issittumi nunat tallimat territoriamikkut pisuussutimikkullu unammillerneqassapput. Taakkua eqqissisimasumik suleqatigiinnerat ingerlaqqissinnaava ingerlaqqissavalu", peqataasussanut saqqummiussami allassimavoq, peqataassappullu Sara Olsvigip saniatigut amerikarmiut ambassadøriat Rufus Glifford, franskit ambassad'riat André Francois, canadamiut aallartitaqarfiannit Nordisk Rådimillu sinniisut, Finn Sørensen Enhedslisten-imeersoq, kiisalu kontreadmiral Niels Wang, Forsvarsakademi-meersoq.

Kalaallit Nunaat allakkut aamma peqataatitaqassaaq. Inatsisartut siulittaasuat Lars-Emil Johansen filmi "Idealismen" pillugu Politiken-ip aaqqissuisuunera Bo Lidegaard oqalliseqatigissavaa, filmimilu oqaluttuarineqarpoq amerikarmiut timmisartuat B-52 qaartartorsuarnik usisoq 1968-imi Thule Air Basep eqqaani nakkartoq.

Tamatuma saniatigut filmi piviusulersaarut "Sumi - mumisitsinerup nipaa" takutinneqassaaq, nunatta rockertartuinik tusaamasanik, kiffaanngissuseqarnissamik aalajangeeqataanissamillu erinarsortartut, pillugit filmiliaq.

Inatsisartut siulittaasuata Lars-Emil Johansenip filmi "Idealisten" pillugu Politikenip aaqqissuisuunera Bo Lidegaard oqalliseqatigissavaa.

Powered by Labrador CMS