Naakkittarneq Ikualap katersuiniarnera ilimagisamit iluatsilluarneroqaaq!

Tallimanngormat unnukkut Ikuala Nuup Timersortarfissuani kræftertut ilaqutaannut nuna tamakkerlugu katersuiniartitsivoq.

Timersortarfissuup silataani tupeqarpoq, tassani inuit ilaquttatik kræftimik toqquteqarsimasut eqqaaniarlugit naneruummik ikitsisinnaallutik. Timersortarfissuullu iluani nerriviit scenilu naneruutilersorneqarsimapput.
Isiginnaartut nuannallutillu ersaattaattarput, katersuiniarnermik aqutsisut Josef Lund Josefsenip Arnannguaq Lyberthillu nalunaarutigigaangassuk Ikuala-mut angisuunik tunissuteqartoqartoq. Timersortarfik 500-nik inissalik ulikkaavippoq. Issiavinnik immikkut 200-nik eqqussisoqarpoq, takkuttut 700-t tamarmik issianiassammata.

Suliniutillit siulliit
Heidi Rosing siorna isumassarsivoq Nuummi kræftertut ilaqutaannut aningaasanik katersuiniarniarluni. Nipilersortartoq Hans-Peter N. Bay isumassrsiaminik oqaluttuuppaa.

- Pilersaarutaagaluarpoq katersortarfimmi aningaaasanik katersuiniassasugut, Hans-Peter N. Bay nipilersortuliullugu. Taannali ilisimaneqanngilaq, taamaattumik iluatsinnissaa qularnartoqartissimavarput.

Jens Kristian Berthelsenip isumaliutivut tusaramigit siunnersuutigaa Ikuala timersortarfissuarmi siunertamut aningaasanik katersuiniarsinnaasoq. Piffissap ingerlanerani amerligaluttuinnarpugut pilersaarutivullu annertusigaluttuinnarput. Katersuiniarnermik arlaannarpulluunniit misilittagaqarsimanngilaq. Ullut ilaanni sininngitsoortarsimavunga. Suliaq tamaviaarnarsimaqaaq, iluatsilluaqaarli, Heidi Rosing nuannaarluni Sermitsiaq.AG-mut oqaluttuarpoq.

Aamma Hans-Peter N. Bay, aaqqissuussinermi nipilersornermut akisussaasoq, oqaluttuarpoq isumaqarluni suliartik kinguneqarluarsimasoq:

– Killitsisimaangaarama aaqqissuussinerup ingerlarngani arlaleriarlunga qullipingajattarpunga.

Ikualap siulittaasua
Jens Kristian Berthelsen, Ikuala-p siulittaasua, oqaluttuarpoq qaammatini kingullerni marlussunni sapaatip akunnikkaartumik pilersaarusiorlutik ataatsimiittarsimallutik.

- Inuit aaqqissuussinermik ingerlatsisut 60-it missaanniippugut. Gruppinut agguataarsimavugut tamatta immikkut akisussaaffeqarluta. Assersuutigalugu nipilersornermut gruppeqarpoq, aningaasaliisunut gruppeqarpoq aammalu ataaqatigiissaarinermut gruppeqarluni, Jens Kristian Berthelsen oqarpoq, oqaluttuarporlu aaqqissuusseqataasut amerlanerpaartaat tassaasut ilinniagaqartut, sunngiffitsik atorlugu tallimanngormat unnukkut sunik tamanik ataqatigiissaarisimasut.

- Killitsissutigaara katersuiniarneq ilimagisamit ingerlalluarnerusimaqimmat. Naatsorsuutigisimanngikkaluarparput 1,2 millioner koruuninik katersuissalluta, Jens Kristian Berthelsen oqaluttuarpoq.

Akitsorterussineq iluatsilluartoq
Tikaajaat Geraae Kristensen katersuiniarnermi aaqqissuisut ilagaat, taassumalu akitsorterussineq akisussaaffigaa:

- Killitsinnaqaaq tuniniakkavut ilimagisannit akisunerujussuarmik tunisarsimagatsigit. Naatsorsuutigisimavarput 50.000 koruunit missaanniittut isertissallutigit, katillugillu 73.000 koruuninut tunisaqarpugut. Inuit tapersersuerusunnerat qujamasuutigeqaara.

Callcenteri ulapippoq
Akunnerit pingasut ingerlaneranni Callccenterimut 1.500-t sianersimapput. Akunnikkaartumik holdit pingasut 78-inik inuttallit sulisarput. Ilaatigut Partii Inuit siulittaasuat Nikku Olsen sianertunik tigooqqaavoq:

- Ataatsikkut killitsinnarlunilu tamaviaarnarpoq. Anaanaga 2005-imi kræftimik toqquteqarluni toquvoq ernermalu aanaavaa ullut marluk matuma siornatigut kræftimik toqquteqarpoq, sianernernillu tigooqqaaninni tamanna tunngavigaara. Tulluusimaarutigaara uagut kalaallit taama immitsinnut ikiorniallaqqitsigigatta.
Kommuneqarfik Sermersuumi borgmesteri Asii Chemnitz Narup siarnguttunik aamma tigooqqaaqataavoq:

- Siunertamut taama pitsaatigisumut peqataanera nuannaarutigaara, tamanna killitsissutigaara, tassa ilisarisimasarpassuakka kræftimik toqquteqarsimammata. Ikinngutiga arnaq ungasissorsuunngitsukkut kræftimik toqquteqarpoq. Misigisaq pitsaasuuvoq taama amerlatigisut sianermata aningaasanik tunisiumallutik. Nuannaarutigaara inuusuttut makkua qanoq iliuuseqarmata, allat iliuuseqarnissaat utaqqiinnarnagu.

Tamarmik akeqanngitsumik ikiuupput
Kikkut tamarmik ikiuuttut akissarsiassaq eqqarsaatiginagu ikiuupput. Timersortarfissuup attartornera akeqanngilaq, Deluxux Studio assiliivoq akeqanngitsumik, Tumit Production ilanngutassiorpoq akeqanngitsumik, Tele Greenland A/S-ip Callcenter akeqanngitsumik atukkiuppaa, KNR-mi sulisut akissarsiaqaratik katersuiniarneq nuna tamakkerlugu aallakaatippaat, nipilersortullu tamarmik akissarsiaqaratik nipilersorput, aap, ippassaq suut tamarmik akeqanngitsumik ingerlanneqarput.

- Tamatumunnga atatillugu oqaaseq qujanaq naammanngilaq. Sinnattuvut upperisimavaat, taamaattumik katersuiniarnermi peqataasut tamaasa qutsavigerusuppaka, Hans-Peter N. Bay oqarpoq.

- Aamma katersuiniarnermi peqataasut tamaasa qutsavigaakka. Tamakkoqanngippat pilersaarutivut iluatsissimanavianngikkaluarput, Heidi Rosing oqarpoq.

Hans-Peter N. Bay-p unnuk naalersoq erinarsuut "Neriunneq" atorpaa. Taanna Per Berthelsenimit sananeqarsimavoq, tusarnaartullu ilaat qulliliorput.

Katersuiniarnermut ikiuukkusukkuit 2013-imi juunip 31-iata tungaanut peqataasinnaavutit. Aningaaserivimmi kontunut ukununnga ikisisoqarsinnaavoq:
BankNordik 8120-3060470838. GrønlandsBANKEN 6471-3105137