Naak sinneqartoorutit ikilerialaaraluartut aningaaserivimmi pisortaq naammaginnippoq

Nunatsinni aningaaseriviit annersaat, Grønlandsbanken, 2016-imi ukiup affaani siullermi akileraarneq pitinnagu 47,7 millionit koruuninik sinneqartooruteqarpoq, tamanna ukiumut siulianut sanilliullugu 7,3 millionit koruuninik ikileriarneruvoq.

Aningaaserivik naatsorsuutinik nalunaarutimini taama ilisimatitsivoq.

Nalit appariartut
Pappialat nalillit nalingisa appariarsimanerannik sinneqartoorutit ikileriarnerat pissuteqarnerpaavoq. Taakku nalingisa appariarnerat 11,5 millioniupput, taamaattumillu aningaasartuutit 7,6 millionit koruuninik ukiup siulianut sanilliullugu annertuseriarput.

Ukioq nutaamit taarsigassarsisitsisarnerit 65 millionit koruuninik qaffarialaarsimapput, juunillu naanerani 4 millardit koruuniupput.

Naammagisimaarnartoq
- Angusat siorna angusanut assingusorujussuupput taamaammallu naammaginarluarlutik pissutsit qanoq maanna ittuuneri eqqarsaatigaanni. Erniat appaseqisut erniatigut isertitanik eqquipput saniatigullu pappialat nalillit nalingi annaasaqarfiullutik, aningaaserivimmi pisortaq Martin Kviesgaard oqarpoq.

- Minnerunngitsumilli kvartalip aappaani qaffakkiartortoqarsimavoq, kisianni taarsigassarsitsinerit qaffariaraluartut suli uninngasuutigisagut taarsigassarsiaritinneqartunit amerlanerupput. Nationalbankenimilu aningaasanik inissiisarnerput ullut tamaasa annaasaqassutigisarparput, taanna naqissusiivoq.

Illusisartut amerleriartut
Aningaaserivimmi pisortap isertuutinngilaa, aningaaserivik Kalaallit Nunaanni amerlanerusunik taarsigassarsititsisalernissaa kissaatigalugu.

– Suliffeqarfippassuit ilaqutariillu ataasiakkaat aningaasaliinissamut piareersimasut takusinnaavagut. Maannalu nunatsinni siuariartorneq aalisarnermilu isertitagissaartoqarqarluni sanaartornerullu iluani suliaqartoqarluarnera malunnarpoq. Tamakku suliffeqarfinnut pisortanullu isaatitsilluaataapput aammalu suliffissaaleqinerup appariartorneranik pilersitsillutik, aningaaseriviup pisortaa naliliivoq.

- Tamakku pissutigalugit aningaasaliinissaq inissaqartinneqalerpoq ilaqutariit ataasiakkaat suliffeqarfiillu akornanni. Tamannalu ineriatorneruvoq pitsaasoq. Minnerunngitsumik Nuummi inissanik niurnerit ingerlalluarput, amerlanerillu nutaanik biilitaartorlutillu angallatitaartorput, Martin Kviesgaard oqarpoq.

Attatiinnarneqartoq
Grønlandsbankenimit ukiumut 2016-imut angusatigut isumalluuteqarneq nalinik nalimmassaanerit nalikillilerinerillu pitinnagit 125-145- millionit koruuniniissasoq attanneqartuarsinnarpoq. Ukiup siuliani angusat 137 millionit koruuniupput.

Nalinik nalimmassaanerit pitinnagit angusat 68,2 millionit koruuniupput siorna taamak ilinerani 68,7 millionit koruuniusimasut.

Aningaaserivik ernianit aamma akitsuutitigut isertitat 141,9 millionit koruuniupput, tamannalu 2015-imi ukiup affaani assigaa.