nunatsinnit
Naak ikinngutiga
Nick Nielsenip, nunarsuarmi qaqqat portunersaannik Mount Everest-imik qaqisisimasup, ersissutigaa Nepalimi nunap sajorujussuarneratigut ikinngutigilluakkani ajunaarsimassasoq
"Naak ikinngutiga?"
Siumumi politikeriusimasoq nuimasooq qaqqasiortartorlu Nick Nielsen facobook-imi quppernermini taamatut allappoq, Nepal-imi ukiuni 80-ini nunap aatsaat taama sakkortutigisumik sajunnerata kingorna, tamannalu maanna nunarsuarmioqatigiinnit sammineqartorujussuuvoq. Pinngortamik ajunaarnersuaq, manna tikillugu inuit 2000-t sinnelrugit inuunerannik akeqarsimasoq.
Tamaangali killeqanngilaq.
Ajugaartut amerligaluttuinnartut tusagassiorfiit nalunaartarput.
Nick Nielsenip ikinngunni nepalimiu Pasanga ujarpaa, 2005-imi Mount Everest qaqigamiuk ilagisimasani. Taanna maanna nunarsuarmi qaqqat portunersaanniippoq, tassanilu qaqqasiortartorpassuit maanna nikeriarsinnaanngillat. Apummik arlaleriarluni sisoortoqarneratigut qaqqasiortartut ikiortaallu ikinnerpaamik 17-it ajunaarsimapput, inuillu 61-it aqqunartitersimapput, nunarsuarmi qaqqat portunersaannik qaqisiniartillutik.
– Tusarfigisimanngilara ernumavungalu, Nick Nielsen ikinngunni pillugu allappoq. Ikinngutaata Mount Everest 16-eriarluni qaqisimavaa, taamaasillunilu qaqqasiullaqqissorsuartut oqaatigineqarsinnaalluni. Nuannariinnarluguli taamaasiorneq ajorpoq. Nepal-imi piitsuuffiusumi innuttaasut amerlasoorpassuit inuuniarlutik suleruluttariaqarput. Tamatumani takornarianit ornigarneqarluartartoq Mount Everest pingaaruteqarpoq, aningaasarsiutitulli ulorianartuulluni.
– Neriuppunga nukittusutit pisarnittullu akiuuttutit. Tusarsimavara qaqqasiortartut nunat allamiut ajornartorsiuleraangata ikortaritit. Aputip tiigererivissuaraatit - toqujaartariaqanngilatit. Neriuppunga tusarfigissallutit, Nick Nielsen allappoq, taannalu Nepalimi nunap sajunnera pillugu arfininngormat unnukkut TV 2 News-imi apersorneqarpoq, aperineqarporlu qaqqasiortartut Mount Everest-imiittut qanoq innersut takorloorneraa.
Tassani Nick Nielsenip killitsissimalluni aamma oqaluttuaraa Mount Everestimut angalanissamik pilersaarunni taamaatiinnarlugu. Aqagu, ataasinngornermi, aallartussaasimagaluarpoq, nunamili tassani aliasuttoqarnera pissutigalugu takornariatut angalanissani naleqquttuusorinngilaa.