eqqissisimatitsineq
Naajat tulukkallu nalorninartorsiulerput
Tulukkat, naajat aamma naajarluit ukioq kaajallallugu piniarneqarsinnaanissaat nalunaarummi nutaami siunnersuutigineqarpoq.
Nalunaarut tusarniaassutigineqarluni nassiunneqaqqammerpoq, tamannalu Inatsisartut upernaakkut ataatsimiinneranni aalajangiinerup inerneraa, tassani misileraataasumik ukiuni tallimani tulukkat aamma naajat teriannissallu eqqissisimataanerat atorunnaarsinneqarallassasoq akuersissutigineqarpoq.
Naliliineq
Misileraanerup naareersimalernerani misileraanerup kingunerisaasa sunniutai pillugit naliliiffiginerat saqqummiunneqarnissaa siunertaavoq, ilaatigut eqqissisimatitsinerup atorunnaavissinnaanera pillugu naliliisoqassalluni.
Naajaannaap piniagaanera allannguuteqanngitsoq oqaatigineqarpoq, allannguiniarneq naajanut anginernut tulukkanullu taamaallaat atuutinniarneqarmat.
Eqqissisimatitsiffiusunik tallimanik pilersitsisoqassasoq aamma nalunaarummi atuarneqarsinnaavoq.
Nakkutilliineq sukateriffigineqartoq
Mittarfeqarfiit kommuniluunniit tulukkat naajallu manniinik akuersissuteqaqqaaratik katersisinnaanngortinneqarput imaluunniit uuliaterisinnaanngortinneqarput. Ilisimatuussutsikkut misissuinerit nakkutigineqarneri aamma sukaterneqarput.
Tusarniaanermut ulloq 12. februar killigitinneqarpoq.