uulia
Muté uuliasiortitseqatigiiffissuit Nunatsinnukartikkusukkai
Ukiuni arlalinni uuliaqassutsimik misissuinerup uninnganera pillugu Naalakkersuisoq iliuuseqarpoq
Aatsitassanut Naalakkersuisoq Múte Bourup Egede (IA) Kalaallit Nunaata uuliasiornermut periarfissai nittarsaakkiartorlugit Londonimiippoq.
Ukiuni arlalinngortuni misissuinerit uninngasimasut aallarnisaqqinniarlugit taama misiliivoq.
Uuliat akii 2013-miit 2014-miillu appariartuinnarsimapput, tamannalu Issittumi uuliasiornissap soqutigineqarneranik annikillisitsimavoq.
2017-ip naanerani Qimusseriarsuarmi, Davis Strædemilu 2018-imi uuliasiorfissanik neqeroortitsinermik nittarsaasserusuppoq.
Taakkorpiaalli ippassaq, Mute Borup Egedep (IA) Londonimi nittarsaassinerminni, nittarsaappai.
- Nunatsinni nunap sananeqaataanik ilisimasanik siaruarterinissarput pingaaruteqarpoq. Aningaasaliisinnaasut uuliasiortitseqatigiiffiillu arlallit Kalaallit Nunaata iluaqutigineqanngitsunik uuliaqarfissuaqarsinnaaneranik eqqummaariffeqalernissaat tamatuma nassatarissavaa, taanna tusagassiuutinut nalunaarut aallavigalugu taama oqarpoq.
- Taamaammat nuannaarutigaara nunarsuarmi uuliasiortitseqatigiiffissuit arlallit Londonimi nittarsaassinitsinni peqataammata.