Wednesday, December 6, 2017 - 11:52

Múte: - Sullissineq pisariinnerulersinneqassaaq

Assi.: Leiff Josefsen
Aatsitassanut naalakkersuisup sullissineq sukkanerulersimasoq oqaatigaa, kisianni tamanna naammagiinnarniarnagu neriorsuutigaa.

Ingerlatsineq allaffimmi pissutsinik tunngaveqarpallaartoq. Aatsitassarsiortitseqatigiiffiit 25-t Dansk Industrip misissuinerani sanngiiffiit ilaat taanna tikkuarneqarpoq.

Kalaallit Nunaat aatsitassarsiorfittut ineriartornissaanut tamanna aporfiit ilagigaat taakku isumaqarput. Taamaalillunilu apeqqut aatsitassanut naalakkersuisumut, Múte Bourup Egedep allaffianut toqqaannartumik tuppoq.

Atuaruk: Aatsitassarsiortitseqatigiiffiit: Periarfissaqarluartoq kisianni allaffissornermik tunngaveqarpallaartoq

- Isornartorsiornerup ilaa ilisarisinnaavara, tamanna aamma aatsitassarsiortitseqatigiiffinnit tusarnikuuarput, Múte Bourup Egede (IA) Sermitsiaq.AG-mut oqarpoq.

Sukkanerulersimasut
Sullissinerup sunniuteqarluartarnissaa pingaartitami ilagalugu taassuma oqaatigaa.

- Ukiup kingulliup ingerlanerani ujaarlernermut aamma piiaanissamut akuersissuteqartarnernut sullissinermi piffissaq atorneqartoq malunnaatilimmik sivikillinikuuarput, aatsitassanut naalakkersuisoq oqarpoq.

- Annikitsumik piiaanissamut akuersissuteqarnernut suliat pitsanngortinneqarnikuupput, tassanimi sukkasuumik ingerlasoqalerpoq.

Elektroniskimi qinnuteqaatit aamma piumasaqaatit ajornaannerusut
Tamanna tamaanga killeqassanngitsoq neriorsuutigaa. Ingammik piiaanissamut akuersissuteqartarnerit pitsanngortinneqassapput.

- Tamanna naammagiinnarniarlugu eqqarsanngilanga. Sullissineq suli pisariinninngortinneqassaaq. Tamanna uagutsinnut aamma ingerlatseqatigiiffinnut iluaqutaassaaq.

Elektroniskimi qinnuteqarfissamik pilersitsisoqassasoq oqaatigaa, taanna suliariuminarnerussaaq. Tamatuma saniatigut ingerlatseqatigiiffiit nalunaaruteqartarnernut piumasaqaatinik oqilisaasoqassaaq, taamaalilluni allaffissorneq oqilisaaffigineqassalluni.

Taamaattorli isornartorsiut ataaseq ilisarisinnaanngilaa, tassa sullissisut misilittagakillutillu taarseraannerat.

- Aatsitassanut naalakkersuisoqarfimmi agguaqatigiisillugu ukiut sisamat sinnerlugit sulisoqartarpugut, inuillu ilinniaqqinnissaat iliuuseqarfigilluartarparput, Múte Bourup Egede oqarpoq.

Naalakkersuisoqarfinnut pingasunut agguarneqartut
Piiaanissamut akuersissutinut qinnuteqaatit aatsitassanut naalakkersuisoqarfiup kisimi suliarineq ajorpai. Avatangiisinut nalilersuinerit (ASN) pinngortitamut avatangiisinullu naalakkersuisoqarfimmiipput. Kim Kielsen (S) aamma siulittaasunngorami inuussutissarsiornerup aatsitassarsiornerullu avinneqarnissaat aalajangernikuuaa. Taamaalilluni inuiaqatigiinnut sunniutissaasa misissorneqarnerat inuussutissarsiornermut naalakkersuisoqarfimmut nuunneqarput.

- Aaqqissuussaanermi aporfinnik misissorneqaqqissinnaasunik peqarpa?

- Pitsaanerusumik iliortoqarsinnaajuaannarpoq. Ingerlatseqatigiiffiit misissueqqissaarnermi ersarissumik malittarisassaqarlutalu inatsiseqartut oqaatigigaat maluginiarpara. Aqutsisoqarfiit akimorlugit sullissinerup ersareqataanik pisinnaanersoq alloriarnerup tullerissavaa.

- Illit Naalakkersuisuni akisussaaffiit agguataarneqarnerat allanngortinnissaat sulissutiginiarpiuk?

- Naalakkersuisut siulittaasuata akisussaaffiit agguataarneqarnerat aalajangersartarpaa. Kisianni naalakkersuisut aatsitassanik suliaqartut (Hans Enoksen (PN) aamma Kim Kielsen (S), aaqq.) qaninnerusumik suleqatigalugit oqaatigisinnaavara.

Læs også

savalimmiunit aalisarnermik aaqqissuusseqqinneq
Seneste nyheder / Nutaarsiassat kingulliit