Múte B. Egede IA-p siulittaasuattut qinigassanngortilluni sassarpoq

Sara Olsvigip Kalaallit Nunaanni partiit annersaata tulliani siulittaasutut taartissaa Múte B, Egedeoratarsinnaavoq. Taannami partiit illoqarfinni immikkoortortaqarfiinut aalajangernerminik ippassaq ilisimatitsivoq.

Angorusutarpassuit

Múte B. Egede Sermitsiaq.AG-mut ilisimatitsivoq, partiimi siulittaasutut taamaallaat piareersimanani, aammali nunatta politikkikkut siuttuattut piareersimalluni, partii Inatsisartuni amerlanerussuteqalissappat.

Siulittaasutut sassartoq, maannamut kisiartaalluni sassartuugallartoq, nalunaarpoq ”ammasumik, nutaaliortumik peqataatitsisumillu siuttuunermut” qulakkeerissalluni.

Allannguisoqassasorlu aamma ilisimatitsivoq, tassa ”maanna politikkikkut aalajangiisarnerup ingerlasarnera, pitsaanerusumik innuttaasunillu peqataatitsinerusumik aqutseriaatsimik taarsissallugu”.

Politikki tamanit peqataaffigineqarsinnaasoq

- Assigiinngitsuunerput nukittoqutigaarput tunngavigalugulu. Taamaammat ineriartortitsisariaqarpugut siunissami atugarissaarnissaq eqqarsaatigalugu. Kikkut tamarmik pingaartinneqarlutik misigissavaat, malugalugulu nunatsinnut tunniussaqarsinnaallutik. Taassuma saniatigut Kalaallit Nunaat periarfissagissaartunngortissavarput, kikkut tamarmik siunissamik qaamanerusumik kissaateqalersillugillu peqataaffigiumasaannik. Nuna tamakkerluni, inuiaqatigiit tamamrik, ineriartornermik misigisaqassapput, tamannalu politikkimik tamanit peqataaffigineqarsinnaasumit aallaaveqarpoq, IA-mi politikeri naqissusiivoq. Taanna 2013-imi IA-p inuusuttaani siulittaasutut inissinnermini partiip siulersuisuini ilannguppoq.

Sulinermi angusarpassuit

Múte B. Egede ukiut tallimat ingerlanerinnaani politikkikkut angusaqangaatsiarpoq, taamaasilluni partiimi siuttuni ilaalerluni. 2014-imi ukiakkut qinersinermi taartissatut siullertut qinigaavoq, 2015-ilu aallartissimalaaginnartoq Inatsisartuni issiavissaqalerluni, Mimi Karlsen napparsimalluni sulinngiffeqartariaqalermat. Aaja Chemnitz Larsen Folketingimut qinigaammat, Juliane Henningsenilu politikkimiit tunuavimmat ukioq taanna naanngitsoq Inatsisartuni Múte B. Egede Inatsisartuni issiavissaqalerpoq.

IA-p Siumut Partii Nalerarlu suleqatigilermagit politikkimi suliaqallaqqissuummat Naalakkersuisuni Aatsitassarsiornermut Naalakkersuisutut 2016-imi inissippoq. Tassanilu issialluni ukioq manna aapriilimi qinersisoqarnissaata tungaanut.

Sapinngisat piumassuserlu

- Pisariaqartitatta tungaanut partii aqussallugu ingerlatissallugulu piareersimavunga. Sapinngilanga piumassuseqalrungalu angusariaqakkatta angunissaanut, inuiaqatigiillu pitsaanerusumik ulluinnaqalernissaannut neriuummik tunisisinnaallunga. Piareersimavunga, Inuit Ataqatigiit piareersimapput, siuttuussalluta nunatta qaamasumik siunissaqalernissaanut, Múte B. Egede oqarpoq, taanna ukiorpassuarni aapparisanilu marlunnik ukiulimmik paneqarpoq.

Siulittaasussatut akisussaaffeqalernissarnut inuusuppallaanngilatit?

- Politikkimik suliaqalerama ima eqqarsartarpunga, pissutsit nutaat inuusuttut nukiinik, sapiissusaannik piumassusaannillu pisariaqartitsisut. Oqaatsit taakku taamanili atuuttut suli ullumikkumut tulluarput. Partii inuiaqatigiillu siulersussalluguit piareersimavunga, siulittaasumut sassartoq naqissusiivoq. Taanna Aqqaluaq B. Egedemit taperserneqarpoq, taassumammi Múte B. Egede ippassaani sassaqquaa.