nuannarineqartoq
Musikvideo Nuka Bisgaardimik inuttaqartoq nuannarineqarluartoq
Maliup musikvideoliaata aappaa 'Eqqumiik' 16.000-t sinnerlugit isiginnaarneqareerpoq
Erinnap 'Eqqumiik' musikvideotaa tallimanngormat kingullermik 15 juli unnukkut 23:27 saqqummersinneqarpoq Facebookikkut takuneqarsinnaanngorlugu, taassumalu kingorna takuneqaqattaarnera ingerlaarujuulersimalluni.
- Ippassaq unnukkut 15.000-inik takuneqareersimavoq sulilu ingerlaarujoorluni. Ullaaq 16.000-inik takuneqarsimavoq, Malik Kleist ilisimatitsivoq.
Allaaneruneq
Musikvideo nuusiamit ‘Ulloq Nutaaq Takkuppoq’-minngaanniit saqqummerpoq erinarlu ateqarpoq ‘Eqqumiik’.
Musikvideomi Nuka Bisgaard inuttaalluni peqataavoq inuuninilu allaanerusoq takutippaa.
- Musikvideomi erinamilu siunertaavoq paasitinniarlugu allaaneruneq ajortuunngitsoq, immikkuullarissataasortorlu inunnut. Soorlu oqaatiginiarlugu eqqumiitsuuneq torraqaaq taammaakkami eqqumiitsukajaaguit isumaqarsimassooq immikkuullarittutit, Malik Kleist oqarpoq.
Musikvideo uani takusinnaavat.