Isumannaatsumik angalaneq
Motoori taanna akunnerni 100.000-ni atorlugu
Sarfaq Ittuup pingaarnertut motooria suli akunnerpassuarni atorsinnaavoq maskiinalerisut paarilluarmassuk, Arctic Umiaq Linep pisortaa Jette Larsen oqarpoq
Sarfaq Ittuk umiarsuup pingaarnertut motoorianik pilersuisumi, tyskit nunarsuaq tamakkerlugu ingerlatsivianni MAN-imi, umiarsuarnut motooriliaminik lasbiililiaminillu ilisimaneqartumi, immikkut angusalinnut ilannguppoq.
Sarfaq Ittuk tallimanngormat uppernarsaammik tunineqarpoq, umiarsuup motooria angalanerni ajunngilluinnartumik akunnerit 100.000-t sinnerlugit ingerlasimasoq.
Ukiumut qaammatini qulingiluani umiarsuaq sapaatit akunneri tamaasa Kitaa sinerlugu ilaasunik angallassisarpoq, kujataani Qaqortumiit avannaani Ilulissanut. Aqqutaani illoqarfiit nunaqarfiillu qulit tikittarlugit angalaneq tamanna ullunik unnuanillu 3 1/2-inik sivisussuseqarpoq.
Sarfaq Ittuk umiarsuaq nutaapajaajugaluarluni umiarsuartut sananeqaatsimigut pisoqalilersoq ukiunik 22-nik pisoqaassuseqarluni.
Pisortaaneq Jette Larsen naapertorlugu Sarfaq Ittummi maskiinalerisut umiarsuup pingaarnerusutut motooria ima paarilluartigisimavaat, suli ukiorpaalunni atorneqarsinnaalluni.
Maskiinalerisunut tulluusimaartunut tallimanngormiat pladi umiarsuup naalagaanit Poul Krogsaardinit pisortaanermillu Jette Larsenimit tunniunneqarpoq. Maskiinalerisut tassaapput aserfallatsaaliinermi pisortaq Per M. Nielsen, 1. mester Boas Poulsen, motoorilerisut Enok Broberg aamma Kurt Tittussen.