ilaajumannginneq
Moskvami issittormiut ataatsimeeqatigiinnissaanni Canadamiut peqataanissartik unitsippaat
Ukrainemi pisut isumaqatiginagit Canada ataatsimeersuarnermi peqataanissani unitsiinnarpaa
Ruslandip Ukrainemi iliuusaat isumaqatiginagit, nunamullu iserternerup unioqqutitsisuunera pillugu Issittumi Siunnersuisoqatigiit Moskvami ataatsimiinnissaat Canadamiut peqataaffiginiarnagu nalunaarutigaat.
Ministeri Leona Aglukkag nalunaarpoq. Leona Aglukkag Canadap avannaani ineriartorneranut akisussaasuuvoq, Issittumi Siunnersuisoqatigiinnilu siulittaasuugallarluni.
Canadap Issittumi Siunnersuisoqatigiivisa ataatsimiinnissaanut peqataanissaminnut unititsiinnarnertik ilaatigut ima nassuiaateqarfigaat: 'Ruslandimut unioqqutitsisumik Ukrainemut iserternera, Krimimilu iliuusaat akuersaarneqarsinnaanngillat' Aglukkag oqarpoq.
Ataatsimiinnissat ministerertaqanngitsunik ataatsimiiffiusussaavoq.
Siunersuisoqatigiinni Danmark ilaasortaavoq, tassanilu pingaarutilinnik ataatsimiittoqartarluni, soorlu avatangiisit illersorneqarnissaat pillugit suleqatigiinnerit, aalisarneq, immakkut angallanneq, takornarialerineq, kiisalu uulianik gassinillu nunap iluinit piiaanerit.
Naak Canada ataatsimiinnernut peqataanngikkaluartut, Siunersuisoqatigiit suli tapersersorlugit nalunaaruteqarput.
Silaannaap kissatsikkiartornera pissutaalluuni Issittumi Siunnersuisoqatigiinni ataatsimiinnerit malinnaaffigineqaleriartuinnarput.
Canada ukiuni tulliuttuni marlunni Issittumi Siunnersuisoqatigiivini siulittaasuussapput. Norge, Sverige, Finland, Island, Rusland aamma USA Siunersuisoqatigiinni ilaasortaapputtaaq.