Momo: Saaffiginnittoqarnerata kingorna politiit ilitsersuummik nassiussaqarput
Nanortalimmi politiit internetikkut ingerlaartinneqartoq Momo pillugu nalunaarfigineqarsimapput, taakku Meeqqat Ikiortigit Momomut tunngatillugu siunnersuusiaannut innersuussipput.
- Nanortalimmi politiini ”Momo” pillugu innuttaasup saaffiginnissutaanik tigusaqarnikuuvugut, Kalaallit Nunaanni politiit tusagassiuutinut nalunaarummi allapput.
Internetikkut ingerlaartitaq Momo tassaavoq nassiussisup Momomik imminut taagortup ingerlaartitsinera, taannalu inuusaliaavoq meeqqat inuusuttuaqqallu amerlasuut attaveqaqatigiittarfitsigut ilisimasaat, Kalaallit Nunaanni Politiit ilisimatitsipput.
Meeqqat inuusuttuaqqallu uukapaatinneqarniarsarisarlutillu sioorasaarneqartartut
- Momomik nassiussisup, assersuutigalugu sms-ikkut, meeqqat inuusuttuaqqallu uukapaatinniarsaralugillu sioorasaartarpai imminnut ilaquttaminnulluunniit ajoquseeqqullugit, politiit allapput.
Momomik sioorasaarerpalaartumik tigusaqaraanni toqqortariaqarpoq politiinullu nalunaarutigalugu. Nassiussaq akineqartariaqanngilaq, Kalaallit Nunaanni Politiit taama kajumissaaruteqarput.
Nassiuteqqinneqaqqusaanngitsut
- Momomik nassiussat ingerlateqqinneqassanngillat. Kalaallit Nunaata Politiivisa erseqqissaatigaat Pinerluttulerinermik inatsimmi § 98 naapertorlugu inummut allamut taassuma allalluunniit inuunerata, peqqissusaata atugarissaarnissaataluunniit ajoqusernissaanik annilaangatitserujussuartumik iliuuseqarluni pinerluuteqarniarluni sioorasaarineq inerteqqutaammat, politiit taama allapput.
Tamatuma saniatigut Kalaallit Nunaata Politiivisa Kalaallit Nunaanni Meeqqat Ikiortigit nittartagaani Momo pillugu siunnersuutaa innersuussutigerusuppaa – tassa attaveqaqatigiittarfiit atornissaannik angajoqqaat meeqqaminnik eqqartueqateqartassasut aammalu meeqqamik telefonitik qanoq atorneraat malinnaaffigeqqullugit.
Meeqqat inuusuttullu sunnertaraat
- Momo Challenge piviusuuguni piviusuunngikkaluaruniluunniit meeqqanik inuusuttunillu sunniisarpoq.”Momop” assinga ersigilersarpaat unammilligassamullu atatillugu imminut toqunnissaq tusarlugu ersiulersarput, taamatuttaaq inuusap ”Momop” piumasaa naammassinngikkunikku sorpassuarnik sioorasaarneqarnikkut ersiortinneqartarput. Taamaammat meeqqavit ernumassutai ilungersuutikkit, Meeqqat Ikiortigit taama siunnersuuteqarpoq.
Momo pillugu aammalu isumannaatsumik interneterneq pillugu siunnersuutitsialaat pillugit Kalaallit Nunaanni Red Barnetip nittartagaani atuarneqarsinnaapput.