akit
Mobilinik atuineq akikilleqqissaaq
Nunatsinni normut nunani avannarlerni baltiskinilu atornerat 90 procent angullugu akikillissaaq
Mobilinik normunik nunatsinni pisianik atuisut malunnaateqarluartumik akikillisaavigineqassapput Danmark-mi, Sverige-mi, Norge-mi, Finlandimi nunanilu baltiskiusuni mobil atorlugu internetterneri, oqalunnermi sms-ernermilu. Akit nutaat decemberip 15-aniit atuutilissapput.
Nunani allani mobilip roaming aqqutigalugu atorneranut Danmarkimi ingerlatsisut tamaasa Tele-Postip isumaqatigiissuteqarfigai. Sverigemi isumaqatigiissuteqarfigineqarsimapput Telia aamma Telenor kiisalu Norgemi Telenor aamma Netcom. Finland-imi Telia Sonera, Estland-imi EMT, Letland-imi LMT, Litauen-imilu Omnitel isumaqatigiissuteqarfigalugit.
MB datanik aallernermi aki siullermik 43,75 kr.-it qaangerlugit akeqaraluartoq 3,35 kr.-imut appassaaq. Attaveqaatinik sullissisoq apeqqutaalluni maannamut akigititaasoq assigiinngittarsimaqaaq.
Qallunaanut akigititat
Siunissami sianernermut aki assersuutigalugu Danmarkimiit Kalaallit Nunaannut 1,79 kr.-eqalissaaq, siusinnerusukkut 8 kr.-it missaanik akeqarsimagaluarluni, SMS-imullu aki 2,50 kr. missaaniit, 60 øriinnarmik akeqalissalluni.
Danmarkimiitilluni siusinnerusukkut sianerfigitinneq minutsimut 2,89 kr.-eqarsimagaluarluni, 52 øre-qalissaaq.
- Akinik appaanissaq atuisutta, TELE-POST-illu sivisuumik assut kissaatigisimavaat, taamaammallu nuannaarutigeqaarput akikinnerusumik atuisoqarsinnaalissammat, assersuutigalugumi qallunaanut Sverigimut angalasunut akit assigusut atuutilersinnaalissavagut, teledirektør Anders Barslund oqarpoq.
Atuisulli namminneerlutik qulakkeertassavaat mobilertik ingerlatsivinnut isumaqatigiissusiorifigineqarsimasunut attaveqalersimanersoq.