mobilimik akiliisarneq
Mobilimik akiliisarneq taamaatippoq
Nunatsinni aamma Savalimmiuni Swipp atorlugu aqagu akiliisoqarsinnaajunnaassaaq. Tamatuma saniatigut Mobilepay qaqugu aaqqiissuteqassanersoq nalunarpoq.
Mobilpayimi tusagassiorfinnut akisussaasuusoq Peter Kjærgaard, Mobilepay Kalaallit Nunaanni qaqugu atulersinnaanersoq nalunarnerarlugu Sermitsiaq.AG-mut ilisimatitsivoq.
Kisitsisit arfinillit ajoqutaasut
Mobilepayip systemia telefonip normui arfinillit Kalaallit Nunaanni Savalimmiunilu atorneqartut atorlugit sullissisinnaannginnera ajornartorsiutaavoq.
Aningaaseriviit Swippimik atuisut siorna atuisuujunnaarput, taarsiullugulu Danske Bankip ingerlataanik Mobilepayip aaqqiissummik isumaqatigiissuteqarput. Swippilu ukiormanna februaarip naanerani atorunnaarsinneqassasoq aalajangiunnerqarpoq.
''Uggornarluinnarpoq''
Grønlandsbankenimi pisortaq Martin Kviesgaard, aningaaseriviup sullitaanut mobilikkut akiliissutaasinnaasumik aaqqiissutissaqannginnera ''uggornarluinnartoq'', Sermitsiaq.AG-mut januaarimi oqaatigaa.
Mobilikkut akiliisarneq atorneqartorujussuuvoq. Kalaallit Nunaanni inuit 18-inik ukioqalereersimasut piumasaqaatinik naammassinnittut sisamararterutaasa Swipp atortaraat, Martin Kviesgaard ilisimatitsivoq.