Mittarfiup nipituuliortarnissarsua nalunaarusiami eqqortuunnginnerarpaat

Nuummi mittarfik timmisartunik anginerusunik miffigineqarsinnaalersinniarlugu 950 meteriniit 2200 meterinut tallineqassaaq. ASN-millu nalunaarusiami, mittarfittaassaq illoqarfiup innuttaasuinut nipitunissaanut ernumassuteqarneq, eqqortuunnginnerarneqarpoq.

Nipiliortitsineq annertunerulissaaq

Mittarfimmi tikitittut aallartullu amerlanerulernissaat naatsorsuutigineqarmat, ullormut nipiliortitsinerit annertusineqassasut, nalunaarusiami allassimavoq. Erseqqissaatigineqarporlu nipiliornerup killingatut missingersuutit eqqortinneqarsinnaassasut.

- Ingerlatsinermi killiffimmi timmisartut aallarnerannit aamma mittarnerannit nipiliortoqartassaaq, kiisalu aallartarfimmi tikittarfimmilu sulianit nipiliornerit. Mittarfimmik alliliinermi ilaasut marloriaatit miss. amerlassuseqalissapput, taassuma kingunerissavaa nipiliornerup marloriaataata miss. qaffannissaa. Timmisartut suussusaata, aallartarnerisa allanngornerat, tikikkiartornermi aallarnermi aqqutit allanngornerat aammattaaq nipiliornerup siaruartarnerata maannakkumut naleqqiullugu allannguuteqassaaq. Timmisartut anginerusut - ullumikkumut akerliuanik – Nuuk qulaallugu ingerlasassanngillat, tamanna ullumikkumut naleqqiullugu pitsannguutaassaaq. Ataatsimut isigalugu taamaattoq nipiliornermut ilapittuut qaffasinnerulissaaq, kisianni nipiliornerup killingatut missingersuutit eqqortinneqarsinnaassapput, aamma nalilersuiffigineqarpoq ataatsimut isigalugu sunniut minnerusoq pineqartoq, nalunaarusiami allaasimavoq.

Qaangiinerit

Inissiallu qaninnerit mittarfiup kangisissortaaniittut nipituuliornissamut killigitinneqartoq qaangerneqartarsinnaanera, nalunaarusiami oqaatigineqarpoq.

- Qaangiinermut pissutaapput mittarfimmit aputaajaanermi/saliinermi nipiliornerit. Tamanna pillugu piffissami tassani suliat taakku aatsaat pisariaqartillugu ingerlanneqartassapput, nipiliornerup killingatut missingersuutit qaangerneqarnissaat navianartoqarmat. Ullumikkumut naleqqiullugu nipiliornerup isikkua annertuumik allannguuteqassanngilaq. Ataatsimut isigalugu nalilersuiffigineqarpoq sunniut minnerusoq pineqartoq, Niras Greenland A/S-p Kalaallit Airports A/S-imut ASN-nalunaarusiaani allassimavoq.

Sanaartornermi killiffimmi nipiliorneq

Mittarfiliornermilu nipiliortoqartarnissaa, allassimavoq. Assaanermi, qaqqamik qaartitserinermit aamma ujaqqanik qaartitsikkanik nunniornermi, kiisalu aserorterinermit aamma ujaqqanik qaartitsikkanik dozerinermit nipiliorneqangaatsiartassaaq.

- Sanaartornermi suliat nipiliornerpaat sivikitsuinnaassapput (ukiut 1½ miss.) aamma ineqarfinnit ungasissumit ingerlanneqartassapput, aamma nalilersuiffigineqarpoq minnerusumik avatangiisinut sunniut eqqartorneqartoq, allassimavoq.

Innuttaasunik ataatsimiisitsineq

Sisamanngorpat 7. decmber Katuami inersuaaraani innuttaasunut ataatsimiisitsisoqassaaq, tassani Kalaallit Airportsip teknikeriisa ASN-mik nalunaarusiaq tusarniaassutigineqartoq saqqummiutissavaat. Tusarniaanermi akissuteqarnissamut killigitinneqarpoq 22. januar nalunaaqutaq 16.00.