Mittarfissat: Hurtigrutenip akunnittarfiliornissat aallarnisalerpai
Mittarfiliortiternissamut inatsisip akuerineqarnerata kinguneraa, Hurtigrutenip maanna minnerpaamik millioninik pingasunik kisitsisitalinnik aningaasaliinissamut piareernera.
Inatsisartut ippassaq mittarfiliortiternissamut inatsit akuerimmassuk inuppassuit malinnaapput. Inatsisartuni pisut aamma Oslomit malinnaavigineqarput. Hurtigrutenip pisortaanera Thomas Westergaard Nuummi aamma Ilulissani annertuumik aningaasaliiniarluni pilersaarusiorpoq, taannalu taamaattumik Sermitsiaq.AG-mi malinnaaqqissaarpoq.
- Kalaallit Nunaannut ullorsiorneruvoq annertooq. Paasisinnaavara suliniut sakkortuumik oqallitsitsimmat. Kisianni uannit isigalugu, mittarfiit Kalaallit Nunaannut periarfissarpassuarnik pilersitsivoq, taanna Sermitsiaq.AG oqarpoq.
Inatsisartunullu ilaasortat taaseqqammiinnartut, Thomas Westergaardip Hurtigrutenip Nunatsinni suliniutai suliareqqillugit aallartereerpoq.
- Sunarpiaq aalajangerneqarsimanersoq paasiniaqqissaaleruttorpara. Kisianni ullaaq manna ataatsimiinnissat siunertaralugit mailikkut attaveqarneq siulleq pereerpoq.
Takornarissat tikinnissaannut piareersimassasut
Hurtigruten ilaatigut Nuummi akunnittarfimmik milliardit sisamararterutaanik akilimmik sanaartortitsinissaminut pilersaaruteqarpoq, taanna 120-inik initaqassaaq. Tamatuma saniatigut Nuummi suliaqartut suleqatigalugit sammisassanut arlalinnut aningaasaliissuteqarnissaminut piareersimavoq.
Ilulissani aamma akunnittarfimmik angisuumik sanaartornissamut pilersaaruteqartoqarpoq.
- Maanna suleqatit assigiinngitsut qanoq iliornissarput pillugu erseqqissumik oqaloqatigalugit aallartippugut.
Hurtigrutenip maanna aamma suliniutit piareersarnialerpari, kisianni Thomas Westergaardip akunnittarfinnik sanaartornerit aallartisarneqannginnerini, sanaartugassanik suliarinnittartut mittarfiliornissamut isumaqatigiissuteqarnissamut atsiornissaat utaqqeqqaarniarpai.
- Akunnittarfinnik sanaartornerit aamma suliniutit allat pilersinneqarneri Nuummi Ilulissanilu mittarfik sanaartorneqarnerini suliarineqarnissaat pilersaarutaavoq. Mittarfiimmi piareerpata takornarissanut unnuiffissaqarlunilu misigisassaqarnissaa pingaaruteqarluinnarpoq.
Kalaallit Nunaanni akunnittarfimmik angisuumik sanaartornerup sivisussusaa ukiut pingasut tungaanut sivisussuseqartarnera, mittarfiit sanaartorneqarnissaasa sivisussusaanut tulluartorujussuuvoq.