mittarfiit
Mittarfinnut pilersaarutit politikkerimit ujartorneqarput
Naalakkersuisut illoqarfinni mittarfiliornissamut pilersaarutinik saqqummiusinissaat, Kommune Kujallermi kommunalbestyrelsimut ilaasortap, Naja Lundip (IA) piumasaraa.
- Naalakkersuisooqatigiit isumaqatigiissutissinni allassimavoq Narsaq, Nanortalik, Qeqertarsuaq, Qasigiannguit, Kangaatsiaq, Ittoqqortoormiut inoqarfiillu inuttunerusut ujaraaqqanik mittarfeeraliorfigineqarsinnaanersut misissueqqissaarnerit pissasut. Ulloq manna tikillugu taakkununnga pilersaarummik tusagaqarnatalu takussutissamik saqqummiussisoqanngimmat uggornarpoq, taamaattumik inassutigerusunnarpoq Naalakkersuisoqatigiit isumaqatigiissutersi timitalerniarlugu pilersaarummik aallartitaqaqqullusi.
Kommune Kujallermi kommunalbestyrelsimut ilaasoq, Naja Lund (IA) attaveqatigiinnermut naalakkersuisumut allakkanik ammasuni Naalakkersuisut mittarfiliortitsinissamut pilersaarutinik saqqummiinissaanik piumasaqarluni allappoq.
Attaveqatigiinnermut pissutsit iluarineqanngitsut
Taamaammat mittarfiliornissamut misissueqqissaarnissaq aningaasartalerneqartariaqartoq, Naja Lundip piumasaraa.
- Minnerunngitsumik nunatta kujataani angallannerup kipiluttunarnerujussua innuttaasut naamaginngeqisaat siunissamilu angallannerup qanoq isikkoqarnissaa takorlooruminarnerulissammat naalakkersuisut iliuuseqallaqqunarput, taanna erseqqissaavoq.
Inatsisartunut qinersinerup kingorna naalakkersuisoqatigiilertussat mittarfeeqqanik pingaartitsinnginnissaamut, Naja Lundip ernummatigaa.
- Maanna naalakersuisoqatigiit mittarfeeqqat pillugit misissueqqissaartoqarnissaanik pilersaarutaat kinguarsarneqarsinnaanngilaq. Misissueqqissaarnissamut aningaasaliisoqartariaqalerpoq, Naja Lund oqarpoq.