mittarfiit
Mittarfinnut piffissamut pilersaarut aalajangiunneqartoq
Kalaallit Airportsimi siulersuisut anguniagaqarfiusumik mittarfinnut pingasunut Ilulissani, Nuummi aamma Qaqortumi piffissamut pilersaarummik aalajangiussipput. Suliniutinut taakkununnga pingasunut aningaasaliissutissat suli pissarsiariniarneqassapput.
Ilulissani, Nuummi aamma Qaqortumi mittarfinnut pingasunut suliniutinut siunnersuutit Kalaallit Airportsimi siulersuisut sukkasuumik inissinnissaat sulissutigaat.
2017-imi marsip apriilillu ingerlanerani suliassamut siunnersuummik aamma suliassap pingaarnersaannik suliaqarnermut tunngavissaliisussat inaarsarneqassapput.
Mittarfinnut suliniutinut aningaasaliissutit pissarsiarinissaanut suliassat pingaarnerit ilagissavaat. Tamanna anguniarlugu ingerlatsinermut aningaasalersuinermullu pilersaarut aningaasaleerusussinnaasunut saqqummiussassaq naammassineqassaaq.
- Mittarfiliassat angisoorujussuit pingasut suliarineqarnissaannut piffissamut pilersaarut annertoorujussuusoq siulersuisut eqqumaffigaat, kisianni maannamut suliassamut piareersaalluni suliaqarnerup siumut ingerlasimanera, aammalu siuilersuisut Naalakkersuisunit tapersersorneqarnerat tunngavigalugit misigisimallutik piffissamut pilersaarut aalajangiunneqartoq atoruminartuusoq, siulersuisunut siulittaasoq Johannus Egholm Hansen, tusagassiuutinut nalunaarummi oqarpoq.
Qaqortumi innuttaasut mittarfittaassartik 1.500 meterinik takissusilik 2020-mi naatsorsuutigisinnaavaat. Ilulissani Nuummilu mittarfiit 2.200 meterisut takissuseqalissapput, taakkulu aatsaat ukiut sisamat qaangiuppata naammassineqarnissaat naatsorsuutigineqarpoq.
Suliniutip piffissaliussami naammassissappat, piffissamut pilersaarutip naatsorsuutigineqartup iluani oqartussaasut akuersissuteqarnissaat pisariaqartut taamaallaat apeqqutaassapput, Kalaallit Airports naqissusiipput.