mittarfiit
Mittarfinnut nutaanut pilersaarut suli atuuppoq
2019-imut aningaasaqarnermut inatsisip suliarineqarneranut atatillugu suluusalinnut mittarfinnut arfineq-marluusunut aningaasaliissutit inissinneqassapput, attaveqaqatigiinnermut naalakkersuisoq, Erik Jensen, taama ilisimatitsivoq.
Tasiilami, Ittoqqortoormiini, Qeqertarsuarmi, Qasigiannguani, Kangaatsiami, Narsami aamma Nanortalimmi suluusalinnut mittarfissat nutaat 2019-imi aningaasaqarnermut inatsimmut ilaassasut, Erik Jensenip marlunngornermi tusagassiortunik katersortitsinermi ilisimatitsissutigaa.
Aningaasartai ilisimaneqanngitsut
Suliniutit qanoq akeqarnissai nammineq eqqoriarlugit oqaatigerusunngilai, kisianni sumiiffinnit tamanit suluusalinnut mittarfiit minnerusut qanoq inissinneqarnissaannut titartakkat tamaasa saqqummiuppai.
Sulineq sumiiffikkuutaartunmik pissaaq. Qeqertarsuup Tunuani mittarfiit ataatsikkut sanaartorneqassasut, Erik Jensenip aalajangiusimavaa. Kujataani aamma taamatut. Tunumi akerlianik mittarfiit ataatsikkut sanaartorneqassanngillat.
Misissueqqaarnerit
Tamakku sioqqullugit nunap aamma timmisartornermi teknikkikkut atukkanik misissuinerit ilaatigut suliarujussuit pissapput, inuiaqatigiit aningaasaqarnerannut kingunissanik misissueqqissaarneq aamma innuttaasunik kommuninillu piffissaq eqqorlugu ilanngussinerit.