mittarfiit
Mittarfinnik alliliisoqarnissaq kommuneqarfiit marluk aallartipallakkusuppaat
Sermersuup Qaasuitsulli mittarfimmik alliliisoqarnissaanut aningaasaliissutissanik Namminersornerullutik Oqartussat ujaasineranni ikiuukkusupput
Kommuneqarfik Sermersuumi Borgmesterip Asii Chemnitz Narup (IA), Qaasuitsulli Kommuniani borgmesterip Ole Dorphip (S) Ilulissani Nuummilu mittarfiit allineqarnissaat aallartinneqapallannissaat kissaatigaat.
Mittarfinnillu alliliisoqarnissaanullu aningaasaliisussanik Namminersornerullutik oqartussat ujaasinissaannik ikiorusuppaat.
Attaveqaqatigiinnermut Naalakkersuisup, Múte B. Egedep paragraf 37 aqqutigalugu apeqqummut akissummini 'mittarfiit tallineqarlutik naammassineqarnissaannut piffissaliussap eqqortinneqarnissaa ajornakusuussasoq' nassuiaassutigaa.
Atuaruk: Kalaallit Airports: Aningaasat nanissaqqaarpavut
Kinguarsarneqassanngilaq
Taamaammat Asii Chemnitz Narupi Ole Dorphilu ikioqataarusupput.
Mittarfiit tallineqarnissaannut aningaasaleerusuttunik ujarlernissamut ikiuussinnaanerput neqeroorutigaarput. Nuummi Ilulissanilu mittarfiit tallineqarnissat kommunit marluulluta soqutigisaraarput. Tassami Kalaallit Nunaat tamakkerlugu ineriartortiinnarneqassappat talliliinissamik piffissaliussaq kinguartinneqaraluni unitsiinnarneqassanngilaq,” Qaasuitsup Kommuniata borgmesteria, Ole Dorph, Kommuneqarfik Sermersuumut taama oqarpoq.
Asii Chemnitz Narup isumaqataavoq.
- Suliffeqarfiit piareersimapput aallartinnissaminnut. Tassami mittarfinnik talliliinerup pilersissavaa inuussutissarsiornerup ilorraap tungaanut aallartinneqarnera aamma takornariat amerligaluttuinnartut pitsaasumik periarfissinneqarnissaat anguneqassalluni. Mittarfiillu siunissami kikkunnit ingerlanneqarlutik pigineqarnissaat pillugit Múte B. Egede aaqqiissutaasinnaasunik oqaloqatiginissaanut qaaqquvarput,” Kommuneqarfik Sermersuup borgmesteria, Asii Chemnitz Narup oqarpoq.
Atuaruk: Mittarfiit sinnerlugit borgmesteri nuannaarpoq