Mittarfinni suliffinnik pilersitsinissamut millionillit

Qaammatini aggersuni Nunatsinni mittarfinni immikkut ittumik ulapittoqassaaq. Mittarfeqarfinni suliniutit arlallit Namminersorlutik Oqartussat sanaartornermut nutarterinermullu aningaasaateqarfiannit aningaasaliiffigineqarput suliffinnik pilersitsinissaq siuariartornissarlu siuarsarniarlugit.
Tamakkua tassaapput Nuup avataani suliassat, manna tikillugu ingerlanneqarnissaannut aningaasassaqartinneqarsimanngitsut.
Mittarfeqarfiit ingerlatsivimmi suliassat pisariaqartut siuarsarnissaannut 17,3 millioner koruuninik aningaasaliiffigineqarput. Aningaasat sanaartornermut nutarterinermullu aningaasaateqarfimmeersuupput, aningaasaliissutillu nunami sumiiffinni arlalinni sulinnik nutaanik pilersitsissapput.
– Suliniutit maanna aallartitassavut sivisuumik ingerlakkusussimavagut. Suliassat pingaaruteqartuupput, suliarineqareerpatalu arlallit uagutsinnut nukissamik sipaarutaassapput, aammalu atuisartutsinnut isumannaannerulerlunilu inuulluarnarnerulissalluni. Tamanna peqatigalugu suliffissaaleqisunik ajornartorsiutinut ikiorseeqataasinnaapput. Taamaattumik illua'tungeriinnut tamanut isumaqatigiissut pitsaasuuvoq, Mittarfeqarfiit pisortaat Jens Lauridsen oqarpoq.
Suliniutit Mittarfeqarfiit 2014-imi aallartitassai, Nunatsinni suliffissaaleqineq akiorniarlugu Naalakkersuisut iliuusissatut pilersaarutaasa ilaattut:
* Kulusummi erngup aqqutaa nutaaq.
* Kangerlussuarmi Narsarsuarmilu akunnittarfinni ikuallattoornissamut atortut nutarsarneqassapput.
* Kangerlussuarmi erngup aqqutaa nutaaq, 2012-mi Watson River-ip superujussuarnerani aserorneqartumut taartissaq
* Hotel Kangerlussuup kuuffiisa nutarsarnerat
* Hotel Kangerlussuarmi matut igalaallu ussissarnerat
Suliassat tamarmik piaarnerpaamik suliarinnittussarsiuunneqassapput, Mittarfeqarfiillu tusagassiorfinnut nalunaarutikkut allapput neqeroorutissarpassuit qilanaaralugit, minnerunngitsumik sumiiffinni ingerlatsivinnit.