Ilinniarneq
Mittarfimmut nutaamut piareersarneq: Nammineq timmisartortunik aqutsisussanik ilinniartitsineq
Kalaallit timmisartortunik aqutsisut mittarfinni nutaani aqutsineq tigussavaat
Mittarfeqarfinni ilinniagaq nutaajulluinnartoq neqeroorutaalissaaq. Tassa timmisartortunik aqutsinermut ilinniarneq, silaannakkut angallannermut ingerlatseqatigiiffiup maanna ilinniagaq nunatsinni ingerlannialerpaa, mittarfinnut nutaanut anginerusunut pilersaarutit sulisunik amerlanerusunik pisariaqartitsinissaat naatsorsuutigalugu.
- Aappaagumi nunaqavissunik timmisartortunik aqutsisunik siullernik peqalernissarput Mittarfeqarfinnit ilimagaarput, taamaalillutalu atorfiit nunaqavissunik immikkut ilinniagalinnik inuttalersorlugit. Mittarfiit siunissami allineqarnissaannut atatillugu Kalaallit Nunaat qitiusumik inissisimaffiit nunaqavissunik sulisoqarnissaanut aamma piareersimassaaq, pisortaagallartoq Niels Grosen oqarpoq.
Timmisartortunik aqutsinermut ilinniarneq Islandimiut ISAVIA suleqatigalugit ingerlanneqassaaq, taassuma Islandimi mittarfiit tamaasa ingerlatarai, tamanallu Nunatsinni Islandimilu ingerlanneqartassaaq.
Mittarfeqarfiit AFIS-ini sulisui, maanna mittarfinni minnerusuni sulisut siulliullutik ilinniakkamut nutaamut pilerinartumut qinnuteqarsinnaassapput. Kisianni toqqarneqarnissaq ajornaatsuinnaanngilaq.
Atuaruk: Qaqortumi mittarfissap inissisimaffissaani qaartitsineq siulleq
- Ilinniagaq assoroornartuuvoq, inissaatigullu marluk eqqarsaatigalugit oqaatsinut pikkorissuunissaq pisariaqarpoq, attaveqarnermut pisortaagallartoq Hans Henrik Lichenberg Sermitsiaq.AG-mut oqarpoq.
Siunissami timmisartortunut aqutsisunik amerlanerusunik ilinniartitsinissaq pilersaarutaavoq, taamaalilluni mittarfinni illorsuarni kalaallit ilinniarsimasut sulisorilerneqarniassammata. Maannakkorpiaq islandimiut, sverigemiut imaluunniit danskit Kangerlussuarmi timmisartumik angallanneq aqutaraat.
Ilinniakkamut nutaamut qinnuteqarnissap decembarip 15-at killigaa, naammassinnittunullu Mittarfeqarfiit atorfinitsitsinissamut neriorsuipput.