Mittarfiliortitsinissaq sukkasuumik aalajangiiffigineqartariaqarpoq
Air Greenland mittarfiliortitsinissamut aalajangiisoqarnerata kingorna suliffeqarfik ukiut pingasut angullugit aaqqissuusseqqissasoq, timmisartuutileqatigiiffiup ataatsimeersuarnerani siulersuisuini siulittaasoq oqarpoq.
- Mittarfiit qanoq aaqqissuunneqarniarnersut piaarnerpaamik paasisaqarfiginissaa, pingaaruteqarpoq, Air Greenlandip siulersuisuini siulittaasoq Søren Lennert Mortensen timmisartuutileqatigiiffiup Nuummi ataasinngormat ataatsimeersuarnerani oqarpoq.
- Atortuutinut suliffeqarfiullu aaqqiissuunneqarneranut kalluaanissaa naatsorsuutigaarput, soorluttaaq aaqqissuusseqqinneq sulisut ilinniartitaanerinut annertuumik sunniuteqartussaasoq, taanna oqarpoq.
- Qanoq sukkatigisumik paasisaqarfigissavisiuk?
- Aap, ippassaq paasisimangaluarutsigit iluassangaluarpoq. Timmisartut qanoq ittut atussanerlutigit paasisussaavarput. Timmisartuutitaarniarnermilu utaqqisoqartarpoq, siulersuisut siulittaasuat ataatsimeersuarnerup kingorna oqarpoq.
- Aaqqissuusseqqinnermi piffissaq qanoq sivisutigisoq atussavisiuk?
- Allanngortiterinermut sulisunullu ilinniartitsinermut ukiut marluk-pingasulluunniit atussavagut. Mittarfiit sananeqartussat apeqqutaallutik atortut pisariaqartinneqartut qanoq sukkatigisumik pissarsiarisinnaanerigut aamma apeqqutaassaaq, Søren Lennert Mortensen oqarpoq.
Air Greenlandip pisortaanerata Jacob Nitter Sørensenip 2017-imut ukiumut naatsorsuutit 2016-misuulli 1,3 milliardinik kaaviiaartitaqarsimaneq saqqummiuppaa. Tamanna timmisartuutileqatigiiffiup 2017-imi kiffartuussinissamik isumaqatigiissutinik annaasaqarsimangaluarluni anguvaa. Kaaviaartitani annaasat timmisartuussinerni allani matussuserneqarpoq.
2017-imi ukiumut naatsorsuutini angusat akileraarutit suli ilanngaatiginagit 71 million koruuniupput, tassa 2016-imi 41 million koruuninik angusaqarfiusumut sanillersuunnerini 30 million koruuninik pitsanngoriaateqarfiulluni. Qeqertarsuup Tunuani Kujataanilu kiffartuussinissamik isumaqatigiissutit 2017-imi annaaneqarsimangaluartut, taartumilu timmisartuussinissamut maleruaqqusat nutaat eqqunneqarsimangaluartut aammalu qulimiguullip S-61-ip 21,3 million koruuninik naleqartup atorunnaarsinneqaraluartoq, pitsanngoriaat anguneqarpoq.
Timmisartuutileqatigiiffiup 2017-imi unammillerfiusuni ilaasutigut 6 procecentimik qaffariaateqartitsivoq. Tassa timmisartuutileqatigiiffiup Qeqertarsuup Tunuani Kujataanilu kiffartuussinissamik isumaqatigiissutinik annaasaqarfianiit ilaasorineqartut amerlanerulersimapput.
Siulersuisut qinigaaqqipput ukuullutillu: Siulittaasoq Søren Lennert Mortensen, siulittaasup tullia Claus Holstein, Bodil Marie Damgaard, Leif Rasmussen, Jan Torberger aamma Bjarneq Eklund kiisalu sulisut pingasut Henrik Maule Steinbacher, Claus Motzfeldt aamma Sam Grønvold.