Mittarfiliortiternissamut inatsit Demokraatit nangaassuteqaratik taperserpaat

Demokraatit ikinnerussuteqarlutik naalakkersuisoqatigiinnut partiitut tapertaaniarlutik isumaqatigiissuteqaramik, mittarfiliortiternissamut inatsisip akuerineqarnissaanut tapersiiniarlutik neriorsuuteqarput.

Demokraatillu siulittaasuata Niels Thomsenip tamanna ullumikkut naammassivaa. Mittarfiliortiternissamut inatsisissap ullumikkut oqaluuserineqarnerani siunnersuummut nangaassuteqarani tapersersuinini oqaatiginiarpaa.

- Matumuuna nalunaarutigereerusupparput siunnersuut akuerillugu, oqaaseqaataani oqaaseqatigiinni siullermi tamanna allaqqavoq.

Mittarfiit atugarissaarnermut tapertatut

Taamaalillunilu Nuummi aamma Ilulissani 2.200 meterisut takissusilimmik kiisalu Qaqortumi 1.500 meterisut takissusilimmik mittarfiliornissat amerlanerussuteqartut qulakkeerinninnerat naqissuseqqippaa.

- Ukiorpassuarni oqallisigineqarpoq mittarfittaartoqassanersoq, aamma mittarfittaartoqassaguni mittarfiit sumiissanersut qanorlu takitigissanersut. Oqallinnerit saniatigut misissuinerit annertuut suliarineqartarsimapput. Politikkikkut inuiaqatigiinnilu oqallinnermi sammineqarnerit ilagaat mittarfiliortoqassappat atugarissaarneq pilliutigineqassasoq, eqqarsartoqarluni aningaasat atungarissaarnermut atorneqartariaqaraluartut mittarfiliornermut atorneqassasut. Demokraatini isumaqarpugut taamannak isummersorneq kukkusuusoq, oqaaseqaammi nangilluni tamanna oqaatigineqarpoq.

- Demokraatini isumarput tassaavoq, inuiaqatigiinni atungarissaarneruneq angujumallugu ullumerniit aningaasarsiornerusariaqartugut. Tassa allatut oqaatigalugu aningaasarsiornerunikkut atugarissaarnerunissaq akissaqartinnerulissuarput.

Nunanit allanit aningaasaliinerit nuannaarutigigai

Mittarfiliortiternissanut Danmarkip ilanngunneranut Partii Naleqqap isornartorsiuinera Niels Thomsenip isumaqatiginngilaa.

- Aningaasalersuinermut tunngatillugu maluginiarparput danskit naalagaaffiata aningaasaliinikkut piginneqataasutut inissinnissaa oqallisigineqartoq. Demokraatit ersarissarusupparput isumaqaratta aallaavittut pitsaasutut isigigatsigu avataaneersunik aningaasaliititsinikkut suliniutinik annertuunik aallarnisaasarnissaq.

Mittarfiliortiternerit arlalissuarnut sunniuteqartitsissasut isumaqarpoq, taakkulu mittarfiit nutaat misissueqqissaarfigineqarnerini ilanngunneqarsimanngillat. Tamakkua ilagaat ataatsimut isiginninnermi niuernerup annertusinissaanut eqaannerulernissaanullu periarfissagissaarnerulerneq, akunnittarfinnut aamma neriniartarfinnut aningaasaliinerit aamma sanaartortoqalernerani.

- Taamaattumik Demokraatini qularinngilarput inuiqatigiittut iluaqutissarput maanna saqqummerneqartumiit eqqartorneqartumiilu annertunerujussuussammat. Tamannarpiarlu peqqutigalugu siunertamut tapersersuinerput sakkortuseriaannarpoq.