Mittarfiliornerit: Ministerip kinamiut sanaartukkanik suliaqartartut aarlerisaarutigisimannginnerarpai

Kalaallit Nunaanni sanaartugassanik suliarinnittussarsiornermi kinamiut suliarinnikkumanissaat pillugu danskit naalakkersuisuisa Kalaallit Nunaat aarlerisaarnikuunngilaa, nunanut allanut ministeri taama oqarpoq.

Mittarfiit naalakkersuisunit pigineqartut, Kalaallit Airports A/S-ip, mittarfiit pingasut sananeqarnissaannut sanaartornermik suliaqartut tallimat peqatigalugit kinamiut ingerlatseqatigiiffiat suliarinninnissamut neqeroorsinnaanera akuersissuteqarfigaa.

Samuelsen ilumuunnginneraavoq Danskit naalakkersuisuisa suliarinnittussarsiorneq pillugu Kalaallit Nunaannut aarlerisaaruteqarsimanerannik nutaarsiassaqartitsiviup Reutersip allaaserisaqarnera Anders Samuelsenip (LA) Ritzauimut ilumuunnginnerarpaa.

Reutersip ilanngutassiaa naapertorlugu, kinamiut sanaartugassanik suliaqartartut toqqarneqarnerisigut Danmarkip qanimut USA-mik peqatiginninneranut sunniuteqarsinnaaneranik aarlerisaarineq pissuteqarpoq.

Reutersip danskit atorfilittaat qaffasissumik inissisimasoq oqaloqatigisimavaat, taanna nutaarsiassaqartitsivimmut oqarpoq ‘’ernumasorujussuulluni. Kina Kalaallit Nunaanni susassaqanngilaq’’.

Kinaassutsimik isertuussilluni oqartoq

Atorfilittaq kinaassutsiminik isertuussinissani piumasaralugu taama oqariartuuteqarpoq.

- Peqatigisarput qaninnerpaaq USA eqqarsaatigalugu annertuumik akisussaaffeqarpugut, atorfilittaq Reutersimut oqarpoq.

Kisianni issuaanerit naalakkersuisut isumaannik takutitsinngillat.

- Reutersip allaaserisaani issuarneqartut naalakkersuisut isumaannik oqariartuutaanngillat, Anders Samuelsen allalluni oqaaseqarpoq.

Tunuarsimaartoq

- Allaaserisap imarisai iserfigerusunngilakka. Kalaallit qineqqusaarnerisa nalaanni apeqqutit Kalaallit Nunaannut tunngasut tunuarsimaarfiginiarlugit naalakkersuisut aalajangernikuupput.

Kalaallit Airports suliaq pillugu Reutersimut oqaaseqarsimanngilaq.

Powered by Labrador CMS