Mittarfilioliortiternissat siammasissumik isumaqatigiissutaanngitsut

Inuit Ataqatigiit aamma Suleqatigiissitsisut aningaasaqarnermut ataatsimiititaliami mittarfiliortiternissat itigartitsissutigineqarnissaa innersuuppaat.

Mittarfiliortiternissat pillugit nuna tamakkerlugu siammasissumik isumaqatigiittoqanngilaq. Aningaasaqarnermut akileraartarnermullu ataatsimiititaliap inatsisissatut siunnersuut pillugu isumaliutissiissutini saqqummiutereeraalu tamanna erserpoq.

Inuit Ataqatigiinnit aamma Suleqatigiissitsisunit ataatsimiititaliami ilaasortat inatsisissatut siunnersuut kiisalu danskit aningaasaleeqataanissaannut allannguutissatut siunnersuut itigartinneqassasoq innersuussutigaat. Partii Naleraq aningaasanut akileraartarnermullu ataatsimiititaliami ilaasortaatitaqanngilaq, kisianni mittarfiliortiternissamut pilersaarummut akerliullutik uteqattaarinikuupput.

Inuit Ataqatigiit mittarfiit pingasut kittaartumik sanaartorneqarnissaannik siunnersuutertik attatiinnarpaat.

- Siunnersuusiatsinni mittarfiliortiternerit kittaartumik ingerlanneqarnissaat aallaaviuvoq, taamaaliornikkut nunatta aningaasaqarnerani akit qaffapiluunnginnissaat suliffeqarfeqarnikkullu nammassisinnaajunnaannginnissaq qulakkeerumallugu, taamaaliornikkullu aamma piffinni sanaartornermik ingerlatsillutillu sulisartullu nunatsinneersut amerlasuut kiisalu taakku malitsigisaannik inuussutissarsiutit allat mittarfinnik allilerinerni peqataasinnaaqqullugit, ataatsimiititaliami ikinnerussuteqartut isumaliutissiissummi oqaaseqaataanni atuarneqarsinnaavoq.

Tamatuma saniatigut apeqquterpassuit suli qulaajarneqarsimanngitsut, partii isumaqarpoq. Kangerlussuup siunissaa ilaatigut pineqarpoq, Danmarkimut isumaqatigiissutip imarisaa, aammalu USA-p pilersaarutaasa imarisaa tamakkiisoq. Apeqqutinut taakkununnga tunngatillugu Naalakkersuisut unneqqarinngitsumik suliaqartut, partii isumaqarpoq.

- Siunersiuinissat arlallit piumasarisimavavut, kingullermik Ilulissat mittarfiata 2800 meteriutinnissaanut amerikamiut milliartilikkaanik aningaasaleeratarsinnaanerannut tunngatillugu. Siunersiuinissamik piumasaqarnerput ataatsimiititaliami amerlanerussuteqartunit piumaneqanngilaq. Ataatsimiititaliap pissutsinik tamakkununnga qulaajaaneqarnani isumaliutissiissummik uannga atsiornera naammaginanngitsoq isumaqarpugut, isumaliutissiissummi tamanna allaqqavoq.

Immikkut ittumik ataatsimiittoqarnissaa kissaatigigaat

Mittarfiit pingasut ataatsikkut sanaartorneqarnissaat kukkunerusoq, kiisalu aalajangiinermut tunngaviusoq annikippallaartoq, Suleqatigiissitsisut isumaqarput.

- Suleqatigiissitsisuni isumarput naapertorlugu taama angitisunik aningaasaliinissamut naammattunik aalajangiinissatsinnut tunngavissaqanngilagut, manna aalajangiineq annertuumik piffissamilu sivisuumi sunniuteqartussaanera eqqarsaatigalugu, partii isumaliutissiissummi allappoq.

- Aamma tamakkiisumik takusinnaanngilarput iluanaarutissatut naatsorsuutigineqartut, saniatigut aalajangingassat amerlammata akilersinnaassutsip sunnernissaanut.

Taamaattumik aalajangiinissaq tuaviuunneqartariaqanngitoq, partii isumaqarpoq, taakkulu aamma isumasioqatigiittoqarsimannginnera isornartorsiorpaat.

- Isumaqarpugut manna siunnersuut immikkut ataatsimiinnermi oqallisigineqartariaqaraluartut, ataatsimiititaliat susassaqartut Inatsisartunilu ilaasortat immikkut aggersarlugit aamma suliaralugit apeqqutit tamaasa akissutillu, matumunnga siunnersuummut atatillugu saqqummersimasut kiisalu apeqqutit manna tikillugu suli akissuteqarfigineqarsimanngitsut suliariumallugit, isumaliutissiissummi tamanna allaqqavoq.

Inuit Ataqatigiit siammasissumik isumaqatigiittoqarnissaanik ujartuipput.

- Atituumik isumaqatigiissuteqarneq naalakkersuisooqatigiit illuatungiliuttullu akimorlugit isumaqatigiinnertut isigaarput. Suliassami taama annertutigisumi nunatsinnullu inuiaqatigiinnullu taama sunniuteqartigisussami atituumik isumaqatigiissusiortoqarusuttoqannginnera naammaginanngitsutut isigaarput, partiip ikinnerussuteqarlutik oqaaseqaataanni tamanna allaqqavoq.

Aningaasaqarnermut akileraartarnermut ataatsimiititaliami amerlanerussuteqartut Siumumeersut aamma Demokraatineersut siunnersuut, kiisalu danskit aningaasaleeqataanissaat akuerineqassasoq innersuussutigaat.

Powered by Labrador CMS