Mittarfiit: Siunnersuisooqatigiit sunniutissaat misissorneqarneri isornartoqartippaat
Mittarfiliornissat pillugit aningaasaqarnikkut misissuinerup piviusunngortinneqarnissaa Aningaasaqarnermut Siunnersuisooqatigiinnit apeqquserneqarpoq
Kangerlussuaq Narsarsuarlu mittarfittut atorunnaarsillugit pingasunik nutaanik mittarfiliornissat aningaasaqarnikkut ilumut pitsaanerussanersoq Aningaasaqarnermut Siunnersuisooqatigiinnit apeqquserneqarpoq.
Siunnersuisooqatigiit Naalakkersuisunut allapput.
Mittarfiliornissamut atatillugu periarfissat Deloittemit misissorneqarput. Ilulissani Nuummilu mittarfissualiornissat Qaqortumilu mittarfiliortoqarnissaa nunatta aningaasaqarneranut pitsaanerpaassasoq ilaatigut nalilerneqarpoq. 280 million koruuninik sinneqartoorfiussasoq nalilerneqarpoq, maannakkumullu mittarfiit atorneqartut siunissamut atuutiinnarneqassappata 1 milliard koruuninik amigartooruteqarfiussasoq nalilerneqarluni.
Aningaasaqarnermut Siunnersuisooqatigiit sumulluunniit attuumassuteqarnatik Naalakkersuisunut siunnersuusiorput. Mittarfiliornissat aningaasartuutaangaatsiarnissaat ilaatigut ilisimaqquneqarpoq.
- Paasissutissat pissarsiarineqarsinnaasut tunngavigalugit kiisalu taama nalunaarsuinerit nalorninartoqarnerat pissutigalugu aaqqiissutissatut periarfissat taakku marluk inuiaqatigiit aningaasaqarnerannut kingunerisassaat pingaarutilimmik allaanerussuteqanngitsut Aningaasaqarnermut Siunnersuisoqatigiit isumaqarput, Siunnersuisooqatigiit allapput.
- Mittarfiit pillugit ataatsimut suliassat aarlerinartut annaasinnaasat kingunerisinnaasaat annertunerupput, akerlianilli siunissami inuussutissarsiutitigut ineriartortitsinissamut periarfissiissallutik aammalu tassuunakkut iluanaarutissat naatsorsukkanut ilaatinneqarnatik, ilisimatitsissutigineqarpoq.