Mittarfiit: Qeqqata Kommuniani inuussutissarsiutinik suliaqartut misissuisoqaqqinnissaa kissaatigaat

Kangerlussuup matuneqarnissaa Arctic Circle Business Councilimit aamma GE Sisimiunit ernummatigineqarpoq

Mittarfiit pillugit siunnersuut siullermik Inatsisartuni oqallisigineqassaaq ullumi.

Tamanna pillugu Arctic Circle Business Council aamma GE Sisimiut partiinut ammasumik allagaqarput.

- Partiinut sukumiisumik eqqarsaatigeqquagut inuussutissarsiornermi ingerlataqartutut kaammattuutigisagut, tassa uagut nunap immikkoortuani najukkatsinnut aalajangernissaq pingaaruteqartoq sioqqullugu.

Aningaasaqarneq pillugu siunnersuisooqatigiinni allakkiarineqartumi erseqqissorujussuarmik takutinneqarpoq maannamut misissuinerit takutitaat tassaasoq mittarfiliornissamut pilersaarutit aningaasatigut iluaqutaanissaat nittarsaassinermut illuinnaasiortumik atorneqartoq.

- Deloitte-p inuiaqatigiit aningaasaqarnerannut tunngatillugu nalunaarusiaa naammaginanngitsoq ACB aamma GE Sisimiut isumaqarput. Taamaattumik arlaannaannulluunniit attuumatussuteqanngitsut misissuinissaat piumasaqatigaat, misissuinermi erseqqissarneqassapput inuiaqatigiit aningaasaqarnerannut sunniutissat, siunissamut pilersaarummut immikkullu ittumik misissuisoqarnisaa tassa mittarfinnut pioreersunut sanaartornissamut tunngatillugu nutarterinissatullu takorluukkanut. Soorlu aamma Aningaasaqarneq pillugu siunnersuisooqatigit immikkut ittumik isiginiarneqartussatut amigaatigineqartut oqaatigigaat, allakkani ammasuni atuarneqarsinnaavoq.

Mittarfiit pillugit inatsisissaq saqqummiunneqartoq isumaqarput suli maannamut erserani Naalakkersuisut pilersaarut sorleq politikkikkut toqqarneraat.

- Taamaalilluni erseqqissarneqanngilaq Inatsisartut politikkikkut qanoq isummerfissaat tikkuussivigineqarnersoq. Taamak annertutigisumik nunap iluani aaqqissuussap allanngortinissaani, ACB aamma GE Sisimiut isumaqarput, Naalakkersuisut suut pilersaarutigineritsik Inatsisartunut inuiaqatigiinnullu oqaatissagaat , aalajangiinerup kingunerisaanik sunniutissat kiisalu nunaqarfiit pinngitsaalisamik matorarneqarnissaannut akisussaaffimmik tigusiumaarnerlutik. Ameerikkarmiut avanersuarmiut pinngitsaalillugit nuutsinnikuuaat, taamatullu qallunaat naalagaaffiata qullissarmiut pinngitsaalillugit nuutsinnikuuaat. Nunatta pisariaqartippaa Naalakkersuisut nunap tamarmiusup pisariartitai innuttaasullu tamarmiusut soqutigisaat aallaavigalugit sulissasut. Akisussaaffillu taanna ilisimaaralugu partiit mittarfissualiassanut siunnersuut isummerfigilerunikku eqqumaffigisariaqarpaat.

Powered by Labrador CMS