Mittarfiit: Bilitsit akii nalornissutigineqartut
Timmisartunut ilaasut ataatsimut akip apparnissaanik misigisaqarnissaat Naalakkersuisut anguniagaraat, kisianni akit ilusissaat pissutsinit massakkut ilisimaneqanngikkallartunik aalajangerneqassapput.
Aningaasaqarnermut Naalakkersuisup, Pele Brobergip, paragraf 37 naapertorlugu apeqqummut akissummi atuarneqarsinnaavoq, timmisartumut bilitsit akiisa apparneqarnissaat qulakkeerneqanngitsoq. Kisianni angallannerup ilusaata allanngortinneqarnerani angalanerup akikinnerulernissaa anguniagaavoq.
Sanaartornissap akia
Timmisartoqarfiit ilusaasa allanngortinneqarnerisa kingorna, sanaatornerit inaarutaasumik akiisa aamma angallannerup ilusaata nutaap, timmisartornermut bilitsit akii aalajangissagai, Pele Broberg ilisimatitsivoq.
- Suliffeqarfissuarnut namminersorlutik oqartussanit pigineqartunut atatillugu ukiorpaalunni aalajangersimasumik politikiuvoq namminersorlutik oqartussat tamakkiisumik imaluunniit ilaannakortumik pigisaanut ingerlataanniluunniit taarsigassarsinissami Naalakkersuisut qulakkeerinnittuusassanngitsut. Ingerlatseqatigiiffiup suliffeqarfittut ingerlanneqarnerani sulianut attuumassutilinnik ingerlatsinerni ingerlatseqatigiiffiit siulersuisui akisussaasuummata, tamatumalu kingunerisaanik sulianik ingerlatsinerit nalinginnaasut aallaavigalugit ingerlatseqatigiiffiit sapinngisamik nalinginnaasumik toqqammaveqarluni ingerlanneqarsinnaaqqullugit, naalakkersuisoq ilisimatitsivoq.
Kangerlussuaq Kangerlussuarmi mittarfik 1.500 meterisut takissusilik attatiinnarniaraanni, aningaasanut inatsisini suliniutip ingerlanneqarnerani 100-200 millionit koruuninik tulleriiaarisoqartariaqassasoq aamma ilisimatitsissutigineqarpoq.
- Kangerlussuami mittarfiup 2.800 meterinik takissusillip attatiinnarnissaani tunngaveqartumik naatsorsuusiortoqanngnilaq. Taamatut pisoqarsinnaaneranik naatsorsuusiorneq nalilersuinissani ilanngunneqarsinnaassaaq, Suleqatigiissitsisuneersumut Tillie Martinussenimut akissummi tamanna allaqqavoq, taassuma apeqqutimini bilitsit akii ukkatarai.