Sermersooq
Mittarfiit sinnerlugit borgmesteri nuannaarpoq
Kalaallit Airports Nunatta attaveqaateqarnerata ineriartorneranik pimoorussilluartumik pisortartaartussanngornera borgmester Asii Chemnitz Narupip nuannaarutigaa
Kommuneqarfik Sermersuumi pisortaanerup, Steffen Ulrich-Lyngep atorfini decembarip aallaqqaataani qimallugu Kalaallit Airportsini pisortanngussaaq.
Atuaruk: Steffen Ulrich-Lynge pisortatut nutaamik atorfinippoq
2013-imili
Steffen Ulrich-Lynge Kommuneqarfik Sermersuumi 2013-imi aasakkulli allaffissornermi qullersanngorpoq.
- Ukiut pingasut pissanganarsimaqaat, allaffeqarfik kommunalbestyrelsilu suleqatigiillutik annertuunik angusaqarluarsimammata, kommunimi innuttaasunut nuannaarutaasunik, Steffen Ulrich-Lynge oqarpoq.
Qujaffigaa
Kommuneqarfik Sermersuumi borgmesterip, Asii Chemnitz Narupip Steffen Ulrich-Lynge 2013-imili sulilluarsimaneranik qujaffigaa, sulininilu suliffeqarfimmi Nunatta siunissaani pingaarutilerujussuarmi, Kalaallit Airportsini, ingerlaqqinnissaanut ajunnginnerpaanik tamanik kissaallugu pilluaqqullugu.
- Nuannaarutigaara Steffen nunatsinni mittarfiit nutaat sanaartorneqarnissaanni siuttussaammat. Ullutsinni suliassat annertunersaasa ilagivaat, kommunitsinni nunatsinnilu tamarmi qaffariartornermik ineriartornermillu kinguneqartussaq, nalunngilaralu Steffen mittarfinnut attaveqaateqarnermullu tunngasunik suliaqarnissani uummateqarluarfigigaa, Asii Chemnitz Narup oqarpoq.
Pisortaagallartussaq
Aningaasaqarnermut Ataatsimiititaq pingasunngorneq novembarip aappaanni immikkut ittumik ataatsimiinnermini pisortaanerugallartussamik ivertitsissaaq. Peqatigitillugu pisortaanermik nutaamik atorfinitsitsinissamut sulineq aallartinneqassaaaq.