Mittarfiit pillugit isumaqatigiissut: Kangerlussuarmi innuttaasut pissangallutik utaqqipput
Mittarfiit pillugit siunnersuut Inatsisartuni akuerisussanngoraat, Kangerlussuarmi innuttaasut pissangallutik tusarnaaleruttorput. Arlallit najukkaminniit nuussallutik eqqarsaatersuuteqarput.
Inatsisartuni amerlanerussuteqartunit, Nuummi Ilulissanilu imarpik ikaarlugu mittarfissuarnik Qaqortumilu mittarfissamik sanaartortoqarnissaanik aalajangiineq nuannaarutigileruttoraat, Kangerlussuarmi innuttasut arlallit nunaqarfimmiit nuussallutik eqqarsaatersuuteqaleruttorput.
- Arlallit nuunniarlutik eqqarsaateqarput. Ilaasa pigisatik tuniniartalereerpaat, aamma uanga, Kangerlussuarmi nunaqarfimmi aqutsisuni siulittaasoq, Knud Olsen (S) oqarpoq.
Mittarfiit pillugit isumaqatigiissut Kangerlussuarmi oqaluuserineqangaatsiartarpoq, naak ilaatigut Inatsisartuni amerlanerussuteqartunit nuannaarnerunngikkaluartut.
- Aqqusinermi (Kangerlussuarmi innuttaasut, aaqq.) naapikkaangata Kangerlussuup siunissaa oqaluuserisarparput. Arlaqartuulluta Nuummi Ilulissanilu mittarfiit tallineqarpata nuussalluta aalajangereerpugut, Knud Olsen oqaluttuarpoq.
Misigissutsit sakkortuut
Nuummi Ilulissanilu mittarfiit 2.200 miiterinut tallineqareerpata suli qulakkeerneqanngilaq Kangerlussuarmi Narsarsuarmilu mittarfiit qanoq pineqarumaarnissaat. Mittarfiit imarpik qulaallugu mittarfittut imaluunniit heliportitut atussanersut suli qulakkeerneqanngilaq.
Ilisimasaqannginnerup Kangerlussuarmi misigissutsinik sakkortuunik kinguneqarpoq. Aamma nunaqarfimmi aqutsisuni siulittaasumut.
- Misigissutsit sakkortupput. Kangerlussuarmiut tamangajatta massakkut pissangalluta utaqqivugut, Kangerlussuaq tamangajammi akunnerni makkunani aqqaamavoq, taanna oqarpoq.
Knud Olsen Kangerlussuarmi ukiuni 27-ni najugaqareerpoq, mittarfeqarfimmilu sulilluni. Soraarninngungajaleramili nuussaguni allami suliffittaapallassalluni ujaasiniarluni aalajangerpoq. Sumiiffimmi allami.
- Naluara sumut nuussanersugut, Kangerlussuarmili pilersaarutigisakka puiguinnartariaqarpakka, Kangerlussuarmi utoqqalinavianngilanga, Knud Olsen naggasiivoq.