Mittarfiit pillugit isumaqatigiissummi iluanaarut annertooq

Attaveqaqatigiinnermut Naalakkersuisup Simon Simonsenip naalakkersuisoqarfiata, ministeriunerup Lars Løkke Rasmussenip aamma Kim Kielsenip isumaqatigiissutaat nalilersorsimavaa, taanna Inatsisartuni aamma Folketingimi amerlanerussuteqartut akuerissagaat naatsorsuutigineqarpoq.

Naalagaaffiup neqerooruteqarnera pissutigalugu mittarfiliortiternissamut pilersaarummut allannguutissatut siunnersuummik suliarinnittoqarsimavoq, taanna Inatsisartuni oktobarip 15-anni aappassaaneerneqassaaq.

Kangerlussuarmi mittarfiup 1.500 meterisut takissuseqartinnissaa inuiaqatigiit aningaasaqarneranni iluanaarutissartaqartoq maanna paasinarsivoq. Siornatigut taamaassimanngikkaluarpoq.

Periarfissatut ilusiliaq alla 1-imi maannakkut naliusoq 280 mio. koruuninit 619 mio. koruuninut annertusitinneqarpoq aammalu Periarfissatut ilusiliamut aallaaviusumut assigiinngissutaa 1.365 mio. koruuninit 1.704 mio. koruuninut annertusitillugu.

Periarfissatut ilusiliaq alla 2-mi maannakkut naliusoq -241 mio. koruuninit 98 mio. koruuninut annertusitinneqarpoq aammalu Periarfissatut ilusiliamut aallaaviusumut assigiinngissutaa 844 mio. koruuninit 1.183 mio. koruuninut annertusitillugu.

Sunniutit imminnut akerleriittut

Naatsorsuutini sunniutit imminnut akerleriittut maluginiarneqaqquneqarput. Naalagaaffik piginneqataalerpat, mittarfinnik ingerlatseqatigiiffimmut iluanaarutit ikileriartussaapput, tamannalu inuiaqatigiit aningaasaqarnerannut sunniuteqarnerlussaaq.

Kisianni periarfissap allap suliniummi kalaallinut inuiaqatigiinnut amerlanerusunik sinneqartoornissaq qulakkeerpaa. Tassami taarsigassarsititseqqinnerup malitsigisaannik ernianut akilersuutinullu sipaaruteqartoqassaaq.

Uku aallaaviupput

Uku tunngavigisat aallaaviupput:

• Kalaallit Airports A/S-imit Namminersorlutik Oqartussanut pissarsiarititassatut naatsorsuutigineqaqqaartut 33 %-ii naalagaaffimmut agguagarsiaritinneqassapput.
• Aningaasalersuinermut aningaasartuutini sipaarutissat tamarmik atuisut akiliutaasa annikillisinnissaannut atorneqassapput.
• Inuiaqatigiit aningaasaqarneranni misissueqqissaarnermi periaatsimut naapertuuttumik naatsorsuutigineqarpoq imarpik qulaallugu timmisartunut mittarfinnik atuisut 51 %-ii ”inuiaqatigiinnut attuumassuteqartuusut” (ilaasut Kalaallit Nunaannut attuumassuteqartut). Taamaattumik aningaasalersuinermut aningaasartuutini sipaarutissat taamaallaat 51 %-ii inuiaqatigiit aningaasaqarneranni misissueqqissaarnermi naatsorsuinermi ilanngunneqarsinnaapput.
• Sinneruttut 49 %-it takornarianut aamma sulinerminni angalasunut Kalaallit Nunaannut toqqaannartumik attuumassuteqanngitsunut tunngassuteqarput, taamaattumillu naatsorsuinermi ilanngunneqaratik.
• Nuummi aamma Ilulissani mittarfiit pioreersut nalingi ilisimaneqanngimmata, taakkua nalingi naatsorsuinermi 0 koruuniutinneqassasoq naatsorsuutigineqarpoq.

Tunngavigisat matuma siulianiittut atorneranni, tamanna Periarfissatut ilusiliap aallaaviusup aamma Periarfissatut ilusiliat allat assigiinngissutaasa 339 mio. koruuninik annertusinerannik malitseqassaaq. 339 mio. koruuninik annertusititsineq sunniinerit imminnut akerleriittut makkua sunniutigaat:

• Inuiaqatigiit aningaasaqarneranni misissueqqissaarnermi Kalaallit Airports A/S-imit Namminersorlutik Oqartussanut pissarsiarititassat maannakkut naliusumi 435 mio. koruuniusut agguagarsiassaritinneqassasut naatsorsuinermi ilanngunneqaqqaarpoq. Pissarsiassat taakkua maannakkut naalagaaffimmut avitseqatigiiffiutigineqassapput, taamaattumik maannakkut naliusumi 145 mio. koruunit naalagaaffimmut agguagarsiaritinneqassasut naatsorsuutigineqarluni. Taamaalilluni Namminersorlutik Oqartussanut pissarsiarititassat, inuiaqatigiit aningaasaqarneranni misissueqqissaarnermi ilanngullugit naatsorsorneqartut 290 mio. koruuniulissapput.
• Erniat sipaarneqartut maannakkut naliusumi ataatsimut katillugit 249 mio. koruuninik aningaasartaqartut, taakkunannga 51 %-it, 127 mio. koruuninik annertussuseqartut, inuiaqatigiit aningaasaqarneranni misissueqqissaarnermi naatsorsuinermi ilanngunneqarlutik.
• Akilersuutissat sipaarneqartut 700 mio. koruunit, taakkunannga 51 %-it, 357 mio. koruuninik annertussuseqartut, inuiaqatigiit aningaasaqarneranni misissueqqissaarnermi naatsorsuinermi ilanngunneqarlutik.