Mittarfiit pillugit aalajangiineq Asiimut nuannaarutaasoq

Kommuneqarfik Sermersuumi borgmesterip, Asii Chemnitz Narupip (IA), Inatsisartuni amerlanerussuteqartut mittarfimmut siunnersuutigineqartoq akuerineqarmat nuannaarutigaa, taanna Nuummi mittarfiup tallineqarnissaanik ilaatigut imaqarpoq.

Mittarfinnut siunnersuut Inatsisartuni pingasunngormat taasissutigineqarpoq.

Aalajangiineq pingaarutilik
- Aalajangiussamik taama pingaaruteqartigisumik amerlanerussuteqarluartut taaseqataanerat nuannaajallannarpoq. Siunissami suleqatigiilluarnissamik neriullualersitsivoq, Kommuneqarfik Sermersuumi borgmesteri Asii Chemnitz Narup tusagassiorfinnut nalunaarummi oqarpoq.

Taassuma aamma Inatsisartut Nuummi mittarfiup 2200 meterinik takissuseqarnissaanik aalajangiussaqarnera nuannaajallaatigaa.

- Tassa aaqqiissutaasussaq pitsaanerpaaq anguneqarpoq. Taanna atorlugu nunarsuarmi sumiiffinnit amerlanerpaanit toqqaannartumik timmisartortoqarsinnaalissaaq. Nuummi aamma Kalaallit Nunaanni aningaasaleerusussutsimik qaffaassaaq, ajornannginnerusumik akikinnerusumillu siumut utimullu angalasoqarsinnaalissammat, soorlu tamanna illoqarfimmi nunallu sinnerani innuttaasunut iluaqutaalerumaartoq, borgmesteri erseqqissaavoq.

Aningaasanik illikartitsereersoq
Illoqarfiit pingaarnersaanni kommuni mittarfiliassamut nutaamut aqqusinniornissamut aningaasanik illuartitsereernikuuvoq aamma Namminersorlutik Oqartussanik mittarfiup allineqarnissaa pillugu suleqatigiinnissamik soqutiginnillutik.

- Qularutigineqassanngilaq Nuummi mittarfimmik nutaamik sanaartornissap qulakkeerneqarnissaanut Kommuneqarfik Sermersooq pilersitseqataanermut tapersiissammat. Juulli sioqqullugu attaveqarnermut naalakkersuisumik (Knud Kristiansenimik, red.) ataatsimeeqateqassaanga, tassani ataatsimut anguniagassarput pillugu suleqatigiinnissaq oqaloqatigiissutigissavarput, Asii Chemnitz Narup oqarpoq.