Apeqqarissaarneq
Mittarfiit: Nuummi akilersinnaalluarpoq - Qaqortumi pitsaanngilaq
AG-p uani sapaatip-akunnerani Kalaallit Airportsip pisortaa Steffen Ulrich-Lynge apeqqarissaarfigaa. Nuummut aamma Nuummiit ilaasut Qaqortumi mittarfissaq annertuumik akilertussaassagaat, taassuma oqaluttuaraa.
- Ilisimasaqarfigilluarpavut. Nuuk, Ilulissat aamma Qaqortoq ingerlakkutsigik qanoq pisoqarnissaa misissorsimavarput, imaappoq ingerlatsinermut attartukkanullu tunngatillugu qanoq inissisimasoqarnersoq. Inuiaqatigiit ataatsimut isigalugit kisitsisimanerit ilisimasaqarfiginngilavut. Kisianni nalunngisarput tassaavoq, Nuummi akilersinnaalluartumik ingerlatsisoqarsinnaasoq, Ilulissani akunnannerusumik aamma Qaqortumi akilersinnaannginnerusumik, Kalaallit Airportsimi pisortaq, Steffen Ulrich-Lynge oqarpoq.
AG: Mittarfiit ingerlanneqarnissaat ataatsikkut kisitsiffigisimavisigit imaluunniit ataasiakkaarlugit?
- Ataatsimut isigalugu tamaasa ilanngussimavagut. Sumiiffiit ataasiakkaat immikkut niuerfittut isigaarput, taava aningaasartornassusaat misissorsimavagut, taamalu sumiiffinni assigiimmik akitsuuteqartitsinissaq inississinnaasimavarput. Isertitat tassaasussaapput aningaasartuutitsinnik matussusiisussat, tamakkununnga ilaallutik attartorsimasanut akilersuutit. Tamakku qanoq ilaasussaqartiginissaa naapertorlugu naatsorsorneqarsimapput.
AG: Kisianni tamarmik immikkoortillugit akilersinnaanngitsumik ingerlatsinissaq siunertaralugu sulisinneqanngilasi, kisianni imminnut tapersariinnissaat siunertaralugu ingerlatsivusi? Imaappoq Ilulissat aamma Nuuk, Qaqortumut akiliuteqassasut?
- Taamak oqartoqarsinnaavoq. Ataatsimut akilersinnaasumik ingerlanneqarnissaat tunaartaralugu sulivugut.
Steffen Ulrich-Lyngep apeqqarissaarfigineqarnera tamaat AG-mi saqqummertumi kingullermi atuarsinnaavat. Uani ataani linki tooriarlugu pisiarisinnaavat.