Konference
Mittarfiit nutaat mittarfiit sinnerinut sunniuteqassapput
Nuummi, Ilulissani Qaqortumilu mittarfiliornissamik pilersaarutit angallannerup akisunerulerneranik kinguneqanngitsoorunnanngilaq.
Pisortaq Jacob Nitter Sørensen Air Greenlandiminngaanneersoq attaveqaqatigiinneq pillugu, "Kalaallit Nunaat – Island – Periarfissat nutaat" qulequtaralugit Nuummi ataatsimiinnermi oqarpoq.
Pisussaaffiit
Taanna paasissutissiivoq, timmisartuutileqatigiiffiup illoqarfiit allat mittarfiliorfigineqartussaanngitsut tikinneqartaannarnissaat pisussaaffigiinnassagaa.
Illoqarfik Maniitsoq assersuutigaa, ullumikkut Nuuk-Maniitsoq-Kangerlussaq utimullu aqqusaarlugit angallavigineqartartoq.
- Angallanneq massakkutut isikkoqartillugu angalasut Kangerlussuarmut Nuummulluunniit aqqusaarniarnerini Maniitsumut aqqusaarneq akisunerulaassaaq. Siunissamilu timmisartuussinerit Nuuk-Maniitsoq atorneqalissasoq, Jacob Nitter Søresen nassuiaavoq, taamaasilluni siunissami timmisartuusseriaaseq angallannerup akisunerulaalerneranik kinguneqassaaq, Maniitsumummi angallannerup imminut akilersinnaasumik ingerlanniarnissaa ajornakusuussammat.
Akimmiffiit peerneqassasut
Taanna paasissutissiivoq, mittarfiliornerit Air Greenlandip periarfissanik nutaanik takunniffigingaa, iluatsissappalli akimmiffiit peerneqartariaqartut.
Mittarfiliornerit soorunami takornariat amerlanerulernerannik kinguneqassasoq, oqaluttuaraa. Kisiannilu oqaatigaa takornarialerinermut ulapiffiunerpaaq sivitsorneqartariaqartoq, taamaasiornikkut timmisartut ilaasorisinnaasaat tamakkiisumik atorluarneqassammata,
- Tassungarpiaq tunngatillugu islandimiut ilinniarfigilluarsinnaavagut, Air Greenlandip pisortaa periarfissanik arlalinnik ilaatigut mittarfeqarfissuit nassiussalerinermut tunngasut pillugit oqarpoq. Timmisartuutitseqatigiiffiillu allat Air Greenlandimut unammillernissinnaanerat takorloorneqarsinnaavoq.
- Kisianni unammilligassaqarpoq, politikkerit eqqumaffigisariaqangaannik, Attaveqaqatigiinnermut Naalakkersuisoq Erik Jensen, Katuami Hans Lyngep inersuaq ataatsimiinnermik ammaasoq, qiviarlugu oqarpoq.
Nassiussat amerlanerit
Timmisartukkut assartuinerit saniatia Royal Arctic Linep Islandimiuneersumut Eimskipimut suleqatiginninnera sammineqarpoq.
Eimskipimi pisortap, Gylfi Sioffússonip, Royal Arctic Linemik suleqateqalernissaq qilanaarisimavaa, nassiussallu ullummikkut nassiunneqartartuniit tallimariaatiniit arfinileriaataanut ikaleriaateqassasut nalilerlugu.