Mittarfeqarfiit nammineerlutik oqaatsinik misilititsisalersut

Kalaallit Nunaanni mittarfeqarfinni timmisartut tingigaangata mikkaangatalu timmisartortartut Mittarfeqarfiillu napasuliaata akornanni attaveqaqatigiinnermut annertuumik piumasaqaateqartoqarpoq. Nalunaarutit eqqoqqissaassapput, oqaatsinik ataatsimut atorneqartut paasiuminartuussapput, tamatigut tuluttujupput qallunaatujullutillu. Taamaattumik napasuliani sulisuusut oqaatsinut piginnaasatik qaqutiguunngitsumik misilitsittassavaat, taamatullu misilitsitsisarneq Mittarfeqarfiit namminneq ilinniarfiata isumagilissavaa.

Mittarfeqarfiit oqaatsinik misilitsitsisartutik nunanut allanut piginnaasaannik pikkorissarteqqikkiartortussaagaluarpaat, napasuliani sulisut (Afis-imik ingerlatsisut) oqaatsinik piginnaasaannik naliliisinnaassusertik pigiinnassappassuk, imaluunniit avataaneersunik oqaatsinik misilitsitsisartunik tikisitsisussaagaluarlutik. Mittarfeqarfimi namminneq oqaatsinik misilitsitsisartunik ilinniartitsisinnaanermut akuersissuteqarsimanngillat imaluunniit namminneq Afis-imik ingerlatsisutik soraarummeersissinnaasimanagit, tassalu aningaasarpassuit atorlugit avataani pikkorissartitsinermut aammalu siunnersortinut atorsimassagaluarpaat.

- Taamaammat Mittarfeqarfinni sulisut angusaqarusulluartut ilaasa nammineq oqaatsinik misilitsitsisarfeqalernissaq taamatullu nammineq oqaatsinik misilitsitsisartunik ilinniartitsisinnaalernissaq sulissutigisimavaat. Oqaatsinik misilitsitsisartut tassaapput nunat assigiinngitsut akornanni akuerisaasumik Afis-imik ingerlatsisut oqaatsimikkut pikkorissusaannik naliliisinnaasuusut, pikkorissutsimullu piumasaqaatit ukiuni kingullerni sakkortunerulersimapput, Mittarfeqarfiit tusagassiutinut nalunaaruteqarput.

Nuannaarutigineqarpoq
- Oqaatsinik misilitsitsisartutsinnik ilinniartitsinerput ingerlanneqartarpoq Trafikstyrelsenimit nakkutigineqarluni, maannalu suliffeqarfitsinni sisamanik oqaatsinik misilitsitsisartoqalerpugut. Tassa maanna nammineq oqaatsinik misilitsitsisartunik ilinniartitsilersinnaalerpugut, aamma nammineq ingerlaavartumik pisariaqartunik misilitsitsinerit, mittarfeqarfinni atuisugut oqaatsitigut qaffasissumik kiffartuussinnaaqqullugit ingerlassinnaalerpagut. Taama nammineq oqaatsinik misilitsitsisartutsinnik ilinniartitsisalernertigut timmisartornermi billetsinut atugassaraluanut aningaasanik sipaarniarnitta saniatigut malittarisassat maleqqissaarniarpagut. Aammattaarli qularutiginngilluinnarparput qaffasinnerpaarfissatut pitsaatigisumik ilinniartitsisinnaalluta, taamaalillutalu suliffeqarfitsinnik Kalaallit Nunannillu naleqalersitsisinnaavugut, Ryan Møller oqarpoq, taanna Mittarfeqarfiit ATS-imi ataqatigiissaarisoraat, taassumalu Mittarfeqarfiiit oqaatsinik misiligutinut atugassanik imalik atuagaq najoqqutassaq suliarisimavaa, aammalu ilinniartitsinermut atugassat ilinniusiat akueritissimallugit.

- Kunngeqarfimmi suliffeqarfiit ikittuinnaat taama akuersissummik peqarput, taamaammat tanngassimaarutigilluinnarparput Trafikstyrelsenip Mittarfeqarfiit atuarfiat ’Mittarfeqarfiit namminneq ilinniarfiat´ akuerisimammagu, tassani namminneq oqaatsinik misilitsitsisartunik ilinniartitsisinnaaleratta, piginnaasaannillu misilitsisinnaalluta, Ryan Møller oqaluttuarpoq.

Qanoq akulikitsigisumik Afis-imik suleqataasup oqaatsimigut misilitsinneqartarnissaanut apeqqutaavoq qanoq pikkoritsiginera. Qaffasinnerpaamik karakterinnakkaanni oqaatsinik misilitseqqittariaqanngilaq, appasissunilli angusaqaraanni misilitseqattaartariaqassaq. Mittarfeqarfinni inuit sisamat missiliorlugit ukiumut qallunaatut tuluttullu oqaatsimikkut misilitsinneqartassapput.